«Табасарандин нурар» газатдин гъубшу нумрайиъ учу мялум гъапIганси, улихьна йигъари республикайиъ «Бабан чIалнан ва литературайин варитIан ужур мялим – 2023» конкурсдиъ Табасаран райондин Рушвларин гъулан мектебдиъ табасаран чIал киврайи мялим Лейла Сефербеговайи кьюбпи йишв гъадабгъну. Гьаму йигъари узу Лейлайихъди сюгьбат гъубхнийза.
1997-пи йисан Рушв’ил гъулаъ мектеб ккудубкIган, адашдин насигьятнахъ хъебехъну, Лейла Сефербегова Дербент шагьрин педучилищейиз урхуз гъягъюру. Училищейин кьяляхъ багъри гъулаъ мялимди лихури, дугъан саки 21 йис шула. Бабан чIалнан дарсарси, Лейлайи бицIидариз шиклар каъбан дарсарра кивра.
Лейлайин адаш Исамудин Сефербеговра хайлин йисари гъулан мектебдиъ директорди гъилихну. Хъа 2005-пи йисхьан мина, директорвалин гъуллугънаан удучIвну, географияйиан дарсар кивра.
«Узуз мектебдиъ урхурайи вахтна варитIан гизаф урус ва табасаран чIалариан дарсар кьабулди вуйзуз. Думу дарсар Зиявудин Зейнудиновичди ва Аьйшат Къазиевнайи киврайи. Дурарихьна йиз гьюрмат лап аьхюб вуйиз. Аьйшат Къазиевна гьамусяаьтра ич мектебдиъ лихура. Думу гьадмукьан рягьимлу ва сабурлу, варидарихъан юкIв убгру кас ву. Узу фунуб конкурсдихьна вая фициб акцияйихьна гьязур шули гъахьиш, дугъу сарпирди чан кюмекнан хил гьачIабккуру. Закур ккебгъру республикайин конкурсдихьна гьязур шулайирин йишвну компьютер чIур гъабхьнийиз. Аьйшат Къазиевнайиз мидкан йишвну саяьт сабдиъ хабар гъабхьнийи ва гьадмусяаьт дугъу узухьна жара компьютер хьади гъул’ан чан бай гьаънийи. Гьацдар мялимарихъди лихувал, дурарихъан аькьюл ва тажруба дубгъувал йиз бахтси гьисаб апIураза. Гьацира мектебдиъ физикайиан дарс киври гъахьи Байрамбег Загьирович ва математикайиан дарс киву Гьюсейн Мусайибович кIваин дарапIди гъитуз шуладарзухьан. Гьяйифки, дурар рягьматдиз гъушну. Думу мялимарин дарсар вари классдиз кьабулди вуйи. Дурарин дарснахьна ва бицIидарихьна вуйи янашмиш’вал жара мялимарихьди тевиган, гизаф фаркь’вал айиб ва уьмурлуг гьадрархруб гъабхьну. ИкибаштIан, йиз адашдин дарсра кьабулди вуйзуз. Хъа сарпи мялим сарихьанра гьархуз шлуб дар. Узуз урхуз ва бикIуз улупу Камил Исрафиловичдин гьарсаб дарс накь кивдарси кIваин илмийиз. Думу мялимар заан гьюрматназ ва тярифназ лайикьлудар вуйи», – дамагъвал кади кIваин апIура Лейлайи.
Лейла Сефербегова мектебдиъ лихурайи йисари райондин ва респуб-ликайин дережайин конкурсариъ хайлин ражари иштирак гъахьну. Улихьна йисари райондиъ кIули гъубшу «Йиз Дагъустан. Йиз Табасаран» резервдин кадрйирин конкурсдиъ сабпи йишв, 2015-пи йисан «ВаритIан ужур мялим» конкурсдиъ табасаран чIалнан дарсар кивру мялимарин арайиъ кьюбпи йишв гъадагъну, думу кьюд йисан республикайин олимпиадйириъ жюрийин вакил ва Владикавказдиъ кIули гъубшу вари Урусатдин бабан чIалар кивру мялимарин форумдин иштиракчи гъахьну. Лейла Сефербегова республикайин образованиейин министерствойин, Табасаран райондин образованиейин управлениейин ва Табасаран райондин главайин терефнаан хайлин гьюрматнан грамотйир, дипломар ва чугъсагъул мялум апIбан кагъзар тувбиинди лишанлу дапIна.
Сабсана далиликан дарпиди гъибтуз шуладарзухьан. ЦIиб улихьнаси Лейлайи Украинайиъ кIули гъябгъюрайи хусуси метлеб айи дявдин операцияйиъ иштирак шулайи ихь эскрариз кюмек тувбан акция тешкил гъапIну.
«Ич гъуландари, йиз майил-мадатди, мектебдин вари мялимари ва урхурайидари, акцияйин тереф уьбхюри, кюмек тувуз хъюгънийи. Хайлиндари мани атIнар, дасмлар, дармнар, итIру сурсатар ва пул уч гъапIну. Уч гъабхьи рягьимлувалин кюмек райондиз гъубхнийча. БицIи вахтналан СВО-йиъ айи ихь эскрари, кюмек гъурубкьунчухьна, варидариз чухсагъул кIури, зенгар гъапIнийчуз. Думу акция цIийи йис улубкьайиз улихьна тешкил гъапIнийза. Хъа цIийи йисаз тялукь вуди, узу ич гъулан касибвал кайидариз, йитим бицIидариз, яшлу касариз ва хайлин йисари мектебдиъ гъилиху мялимариз пешкешар тувбан акция гъубхнийза. Йиз ученикарихъди думу хизанарихьна пешкешар хьади гъягъюри гъахьунча. Баяр-шубариз гьаму жюрейин акцйириъ иштирак хьуз кьабулди ву. Аьгъювалар тувбалан гъайри, ухьу дурариз гьюрмат апIузра улупури ккунду», – къайд гъапIнийи мялимди.
Улихьнаси Лейлайи гиддин курсарра ккудукIну. Багъри ватандин ва республикайин успагьи йишвар, тарихи ядиграр ва саб йишвахъдира тевуз даршлу табиаьт Лейлайиз гьаммишан кьабулди ву. Дугъу чан ляхнин юлдшарихъди сатIиди мектебдиъ урхурайидар хайлин ражари республикайин жюрбежюр районариз ва шагьрариз экскурсйириз хъади гъушну. Гьамусяаьт Лейла, Табасаран райондин юрдарин тарих бинайиан дудубгъну, туристариз багъри райондикан ктибтуз ва улупуз гьязур духьна.
Шиклиъ: Лейла Сефербего-вайи Мягьямед Къурбановдихьан Чугъсагъулин кагъаз кьабул апIура.
