Москва шагьриъ Гьюкуматдин ригъ гьудубчIвру терефнан халкьарин искусствойин музейиъ Расул Гьямзатовдин 100 йисаз бахш вуди, «Расул Гьямзатовдин Дагъустан» ччвур тувну, «Дагъустандин гъул» этнографияйин комплексди выставка тешкил дапIна. Дидин гьякьнаан «Дагъустандин гъул» музейин мялуматарин гъуллугъну хабар тувра. Выставка 2023-пи йисан 12-пи майдизкьан давам хьибди.
Выставкайиз адабгънайи проектди Расул Гьямзатовдин юкIв хъайи Дагъустандин пишекарвалин искусствойин жаради вуйи паяр улупура.
Музейиъ утканди каънайи шикларихъди сабси накьишаринна прикладной искусствойин, Гъяйтагъ гъулан ягълухъар карчувалин, Къубачийин гъизилин художествойин алатар, Дагъустандин халкьарин аьдати палтар ва гьацдар жарадар уч дапIна.
Выстакайиъ Расул Гьямзатовдин уьмрин жюрбежюр вахтари йивнайи шикларин архивдиан 80 шикил, Урусатдин ва Дагъустандин машгьур художникари дизигнайи 40-тIан артухъ шиклар а.
