НичIрасарин гъулаъ цIийи модульный фельдшервалинна акушервалин пунктну (ФАП) ляхин апIуз хъюбгъну.
Душваъ ФАП-дин заведующий Беслан Мягьямедовди гъулан агьалйир кьабул апIура. Учв Беслан Дербент райондин Рукларин гъул’ан ву. Дугъу НичIрас ляхин апIури, магьа 8 йистIан артухъра шула. 2015-пи йисан думу мина гъюруган, гъулан ФАП сар касдин хусуси хуларикк ккайи. Гьаддихъан-мина учв гъулан фельдшерра гьадму хулариъ яшамиш шули, душваъ аьзарлуйирра кьабул апIури гъахьну. Магьа хайлин йисар гъягъбан кьяляхъ, сач НичIрас цIийи, медицинайин гьаму деврин алатарихъди тямин дапIнайи модульный ФАП ачмиш гъапIну.
«НичIрас гъул Табасаран райондин аьхю гъуларикан саб ву. Гьаци вуйивализ лигну, аьзарлуйирра кми-кмиди узухьна илтIикIури шулу. Асас вуди кюмек ккун апIури илтIикIурайидар ОРЗ-йиан, ОРВИ-йиан аьзарлу духьнайидар, аллергия, эпилепсия, кIван давление за ва ис хьувал ва гьацира жара уьзрариан иццурайидар вуди шулу. Гьамусдихъантина му ФАП-диз илтIикIдариз вахтниинди медицинайин ужуб ерийин кюмек апIуз вари мумкинвалар а.
Гъулан агьалйирин кьадар 577 кас ву. Сад йигъандин арайиъ узухьна саки 20 каскьан кюмек ккунди илтIикIури шулу. Гьадрарикан 10 кас бицIидар ву», — кIура Беслан Мягьямедовди.
ФАП ачмиш гъапIхъанмина, Беслан Мягьямедовдихьна, НичIрас гъулан агьалйирси, багахь хьайи Хив райондин гъуларианра инсанар кюмек ккун апIури илтIикIури шулу. Агьалйирин дугъ’ин хъугъ’вал аливализ лигну, яна дугъу сагъ хьуз кюмек апIуруб аьгъяди, гизаф агьалйир, Хючназ больницайиъ дахъуз гъягъюдарча кIури, хулаъ гъузну рубар йивури, чпин сагъламвал мюгькам апIбиин рази шула. Хъа гьамус гъулаъ гъийин деврин тIалабариз жаваб тувру. ФАП-ра айиган, дурар сарун затра райондин кьялан больницайиз гъягъидар.
«Аьхиримжи йисари Дагъустандин сагъламвал уьбхбан министерствойин кюмекниинди, республикайин хайлин гъулариъ гьаму жюрейин ФАП-ар ачмиш дапIна. Му медицинайир идарйир, гъийин деврин технологйир ишлетмиш апIури, жикъи вахтнан арайиъ яратмиш апIурайидар ву. Гьадму жюрейиинди НичIрас гъулаъра яратмиш гъапIу, 72 квадратдин метрин йишв дибиснайи медицинайин идарайиъ аьзарлуйир кьабул апIру, рубар йивру ва прививкйир апIру кабинетар, ва гьацира аьзарлуйихъди гъафи касар диигъру йишварра а. Янаки, пландиинди вуйи ва пландиинди дару медицинайин кюмек апIбан бадали, ФАП гьаму деврин тIалабариз жаваб тувру вари лазим вуйи шей’арихъди тямин дапIна.
Гьацира пуз ккундузузки, идара мани штухъди, электроэнергияйихъди, кьюрдун вахтна манишин тувру гъурулушдихъди тямин дапIна ва ФАП-дин аьтрафар вуйиси барура дизигна. Ликар ккурсуз даршлу, коляскйириъ айидариз кIури, жаради вуйи рякъра дапIна», – аьлава гъапIну ФАП-дин заведующийди.
Къайд апIуб лазим вуки, Беслан Магьямедов НичIрасси, Имшнигъарин ФАП-диъра лихури гъахьну. Яна дугъу 2021-пи йисан авгусдихъан 2022-пи йисан аьхираризкьан гьадушваъра заведующийдин вазифйир тамам апIури гъахьну.
