2022-пи йисан Дагъустан Республикайиъ гьясил гъапIу гъулан мяишатдин сурсатари 186,4 миллиард манат тяйин гъапIну кIури, улихьна йигъари «Дагъустан» РИА-йиъ «Ачухъ гьюкум» проектдин дахилнаъди кIули гъубшу натижйир йивбан пресс-конференцияйиъ РД-йин гъулан мяишатдин ва ипIру-убхъру сурсатарин министр Мухтарбий Аджековди мялум гъапIну.
Министрин гафариинди, гъийин йигъаз Урусатдин регионарин арайиъ Дагъустан Республика гъулан мяишатдин сурсатар гьясил апIбаан хайлин улихь хьа.
Мисал вуди гъадабгъиш, ихь республика АПК-йин малдарвалин, тIумутIчивалин, багъманчивалин цирклариъ кIакIначи регионарикан саб ву.
«Ккудубшу йисан республикайиъ 140 агъзур тонна дюгю гьясил гъапIну. Аьхиримжи йисари гьар йисан дюгю убзурайи хутIларин кьадар артухъ апIура. Гьаци вуйивализ лигну, ккадабцIурайи бегьернан кьадарра ужуб ву. Ццира, натижйир рази апIрудар хьпан бадали, планламиш дапIнайи ляхнар а. Му цирклиъ ляхин апIуз ккуни инвесторарра дагна.
Республикайиъ йимишарна мейв-йир уч апIбаанра ккудубшу йисандин натижйир ужудар ву. Асас вуди йимишарин ужуб бегьер гьясил апIурайидар кьибла Дагъустандин районар ву. Душваъра йислан-йисаз багъарин кьадар артухъ шула, гьадму гьисабнаан гизаф бегьер хру багъаринра.
Мисал вуди гъадагъиш, ккудубшу йисан «Полоса» ООО, «Анжелина» ООО ва хъанара жара тешкилатариан 200 агъзуртIан артухъ тонна йимишар уч дапIна. Цци бегьерин кьадар хъанара артухъ хьибди», – гъапну министри.
Мухтарбий Аджековди туву мялуматариинди, ккудубшу йисан Дагъустандин гъулан мяишатдин артмиш’вализ республикайин бюджетдиан 2 миллиардна 94,2 миллион манат жара гъапIну ва 1, 3 гъулан мяишатдин тешкилатариз гьюкуматдин терефнаан кюмек тувну. Хъа гьаму йисан гъулан мяишатдин ляхнар кIули гъахбаз 2,5 миллиард манат жара дапIна.
«Сач Дагъустандиъ 168 агъзур гектарин хутIлариъ тахил гъубзну. Мидланра гъайри, аьхиримжи йисари 2623 гектариъ, гьаддикан 2333 гектариъ аьмлюхъин ва 290 гектариъ хифун гьарар, кивна. Гьаддихъди сабси, 4655 лихру йишварра ачмиш дапIна.
Ккудубшу йисан 668 миллион манатдин 309 аьдад гъулан мяишатдин техникара масу гъадабгъна.
Хъа малдарвалин циркил жаради гъадабгъиш, мушваъра хайлин ужудар натижйир рякъюра.
Ккудубшу йисан республикайиъ гъуркку мал-къарайин ва пеэрин йи-ккун уьмуми кьадар 265,6 агъзур тонна гъабхьну. Хюнйириккан ккудубзу никкун кьадарну 940,1 агъзур тонна, марччариан ултIубкъу хьайи 14,5 агъзур тонна, хъа пеэри ахьу муртйирин кьадарну 234,8 миллион мурта тяйин гъапIну. Гьаци вушра, му цирклиъ гьелелиг гьял дапIну адру месэлйирра гъузра. Мисалназ, республикайиъ гьясил апIурайи пеэрин йиккухъди вари агьалйир тямин апIуз удукьура, амма дурар муртйирихъди гьелелиг ваъ. Му месэла гьял апIбан бадали, инвесторар жалб апIуз планламиш дапIнача», – аьлава гъапIну Мухтарбий Аджековди.
