17-пи апрелиъ Табасаран райондиз Мюгьяммад пайгъамбрин (с.аь.в.) асарар гъахну. Думу райондин дережайиъ аьхю ва шадлу серенжем ву. Гьаму йигъари жара миллетарин ва районарин агьалйирра кмиди Табасаран райондиз асарариз ибадат апIуз гъягъюра. Узу думу серенжемдиъ иштирак гъахьи, Хюрикк гъулан агьали Гьяжимягьямед Гьяжиевдихъди сюгьбат гъубхунза. Дугъан му серенжемдикан вуйи фикрар исихъ туврача.
«Мюгьяммад пайгъамбрин (с.аь.в.) асарар Табасаран райондиз хруваликан ихь халкьдиз йигъар ккимиди аьгъю гъабхьнийи. Мисалназ, Хюрикк гъулан жямяаьтдиз Хюрккарин гъулан советдин глава Аьлибег Сеферовди гъулан жямяаьтдихъди вуйи чан нубатнан гюрюшдиъ хабар тувнийи. Жямяаьтди думу хабар аьхю разивалиинди кьабул гъапIнийи. Гъулан главайи гьацира Пайгъамбрин (с.аь.в.) асарар райондиъ юкьуд йигъан (17-20-пи апрелиъ) гъузруваликан ва райондин фуну мягьялиз, фуну йигъан Хючна гъулаъ ерлемиш дубхьнайи спорткомплексдиз уч шулуш, хабар тувнийи.
Райондин администрацияйи думу серенжем кIули гъабхайиз мюгькам гьязурлугвалар дапIнайи. Райондиз гъюру гьарсаб рякъюъ гьарсаб гъулан агьалйир са-сарди дийигъну яркьу жергйир тешкил дапIнайи ва дурарин хилариъ чру пайдгъар айи.
Мюгьяммад пайгъамбрин (с.аь.в.) асарар райондиз хру машинарин жерге 15 ва думутIан артухъ машинарикан ибарат дубхьнайи. Хъа машинарин жергейин улихь гьяйвнариин элеънайи атлуйир хьайи. Дурарин хилариъра чру пайдгъар айи. Рякъюн гъирагъарихъди дийигънайи агьалйири, чпиз машинар багахь гъахьиган, «Аллагьу Акбар» гафариинди Пайгъамбрин (с.аь.в.) асарар къаршуламиш апIуйи. Спорткомплексдиъ мусурмнариз ушв гьибтуз ярхи столариин жюрбежюр хурагар гьязур дапIнайи. 17-пи апрелиъ хураг Табасаран райондин глава Мягьямед Къурбановди чан терефнаан, хъа 18-пи апрелиъ Хянягъ гъулан агьали, бизнесдиъ лихурайи кас Назири гьязур дапIнайи.
17-пи апрелиъ гъабхьи ифтариъ, Табасаран райондин главайилан савайи, Хив райондин, Огни шагьрин главйир ва администрацияйин гъуллугъчйир иштирак гъахьнийи. Ифтарин кьяляхъ нашидар гъурхнийи ва лавландин гъудгнар гъапIнийи. Гъудгнарин кьяляхъ десте-дестеди Мюгьяммад пайгъамбрин (с.аь.в.) асарарихъди таниш хьувал кIули гъубшнийи. Думу ляхин жавабдарвалиинди ва заан дережайиъди тешкил дапIнайи. Гьарсаб асарикан мялуматар тувру вакилар дийигънайи ва гьарсаб суалназ гъудубкьу жаваб тувуйи.
Саб гафниинди, гьаму серенжем заан дережайиъди кIули гъябгъюра. Табасаран райондин агьалйириз- халис мусурмнариз му серенжемди аьхю шадвал гъабхну. Лигуз гъафидари думу ужуб серенжем тешкил гъапIдариз аьхю чухсагъул мялум гъапIнийи ва Аллагьдикан гунгьарин аьфи апIувал ккун гъапIнйи».
Дугъриданра, мусурман улматдиз Мюгьяммад пайгъамбрин (с.аь.в.) асарарихъди таниш хьувал аьхю шадвалин ляхин ву. Гъит Первердигар Аллагьди ихь райондиз, халкьдиз ужуб артмиш’вал, саламатвал, берекет туври.
