Дагъустан Республикайин багъбанчивалин цирклиз гьаму йисан гьюкуматдин терефнаан деебтнайи кюмекнан кьадар 1,8 ражари артухъ гъапIну – цци му циркил артмиш апIбаз 457 миллион манат жара дапIна. Улупнайи дакьатарин кьадар сачтIан 75% артухъди ву кIури, улихьна йигъари СтIал Сулейман райондиъ кIули гъубшу заседаниейиъ Дагъустандин гъулан мяишатдин ва ипIру-убхъру сурсатарин министр Мухтарбий Аджековди мялум гъапIну.

 

 

«Лап гизаф бегьер хру багълар кивбаз тувнайи субсидйирин кьадарра хайлин артухъ дапIнача. Мисалназ, сач гьациб жюрейин саб гектар багъ ибтуз 720 агъзур манат субсидйир туврайиш, цци дидин кьадар саб миллионтIан артухъ гъабхьну. Хъа дициб багъдин саб гектариз хъайивал апIуз кIури, туврайи дакьатарин кьадарра 30 агъзурилан 80 агъзур манатдиинакьан за гъапIну.

Мидланра савайи, гьамусяаьт Дербент райондин Берикей гъулаъ, 254,6 миллион манатдин инвестицйир жалб дапIну, 100 гектар лап гизаф бегьер хру йимишдин багъ кивра. Хъа аьхиримжи 5 йисандин арайиъ республикайин муниципалитетариъ 5 агъзурна 600 гектариъ йимишарин багълар кивна. Гьадму кьадарнакан 2 агъзурна 600 гектар гизаф бегьер хру, хъа 815 гектар лап гизаф бегьер хру багълар ву», – аьлава гъапIну министри.