Хив райондин культурайин, спортдин, жигьиларин политикайин ва туризмдин отдели Хив райондин образованиейин отделихъди сатIиди райондин мектебариъ урхурайидарин арайиъ дявдинна ватанпервервалин темайиз бахш дапIнайи «Думу йигъарин ад зяиф хьибдар» кIуру конкурс тешкил апIура.

 

 

Конкурс Расул Гьямзатовдин 100 йис хьпаз ва мялим-тербиячийин Йисандин серенжемарин дахилнаъди кIули гъабхурайиб ву. Думу 2023-пи йисан майдин 4-пи йигъан Хив гъулан РКДЦ-йиъ гъябгъиди.

«Конкурсдин иштиракчйири урус вая бабан чIалниинди дявдинна ватанпервервалин темайиан мяъли дапIну ккунду. Асас вуди Ватандин Аьхю дявдиз бахш дапIнайи вая Расул Гьямзатовдин шиърариан гьязур гъапIу мяълийир кьабул апIиди. Мяъли жвуван сесниинди дапIну ккунду.

Конкурсдиъ 1-пи, 2-пи ва 3-пи йишвар гъадагъу касар жюрийи тяйин апIиди. Сабпи йишв гъадабгъуриз 3 агъзур, кьюбпи йишваз – 2,500, хъа шубубпи йишван сагьибриз – 2 агъзур манат улупна», – къайд гъапIнийи Хив райондин культурайин отделин кIулиъ айи Казбек Къазиевди.

Пшкешнан йишвар гъадагъу баяр-шубар ва гьацира жюрийи гъядягъу варитIан гьевеслуди мяъли гъапIу иштиракчи 9-пи Майдиъ – Гъалибвалин Йигъан кIули гъябгъру концертдин программайикра каъди.