Гьюрматлу мусурман чвйир ва чйир!

Гирами Рамазандин ваз ккудубкIну, улубкьу Ураза-байрам машкврихъди учву марцци кIваан тебрик апIурача.
Магьа вари дюн’яйин мусурмнариз багьалу, вари ккилигурайи, юкIвар Аллагьдиз шюкюр апIбахъди ацIнайи гирами машквар улубкьну.
Ихь абйирин аьдатар уьрхюри, дурарин насигьятар кьабул апIури, рюгь марцц апIури, игьитияж айидариз кюмек туври, ужудар ляхнар апIбахъ хъади саб ваз адапIунхьа. Машкврин йигъан аку Меккайихьинди илтIикIну, миллионариинди мусурмнари Аллагьдикан инсаниятдиз ислягьвал, кIван шадвал ккун апIура. Гъит, дюн’яйиъ айи вари дявйир ккудукIну, кIваъ дерд айи гьарсар касдин кIваз рягьят ибшри.
Машкврин улихьна йигъари Табасаран райондиз Мюгьяммад Пайгъамбрин (саляллагьу аьлейгьи вассалам) асарар гъахну. Агъзрариинди мусурмнар асарариз лигуз, ибадат апIуз, гьадрарикан берекет гъадабгъуз гъушну. Райондиз дуфнайи хялар меценатари, райондин кIулиъ айидари тешкил дапIнайи лавландин сатIиди ушв гьибтувалариъ, сигьринган ушв бисбариъ иштирак гъахьну. Гьамцдар ужудар ляхнари ихь мусурман улматар хъана артухъ сатIи апIура.
Ураза ужудар ляхнарин ва рягьимлуваларин машквар ву. Гизаф инсанарин иштирак’валиинди ушв гьибтувалар, жюрбежюр тешкилатари, бизнесменари, аьдати инсанари сакьат бицIидариз тешкил апIурайи рягьимлувалин ляхнар – гизаф ужудар аьдатар ву.
Машкврин йигъан ухьу багахьлуйирин арайиъ уч духьну, сар-сарихьна айи гьюрмат улупурхьа, гъийихдар кIваин апIури, дурарин рюгьярихъан дюъйир урхурхьа.
Гъит Первердигар Аллагьди ичв юкIвар имандихьди, рягьимлувалихьди, ккунивалихьди ацIри. Учвуз мюгькам сагъ’вал, кIван шадвал, хизандиъ мясляаьт, хулаъ берекет хьувал ккун апIурача.

Редакцияйин коллектив