Апрелин 25-диъ Табасаран райондин Хючна гъулан 1-пи нумрайин лицейдиъ райондин 9-10-пи классариъ урхурайи баяр-шубарин арайиъ математикайиан Зейдула Юзбеговдин ччвурнахъ хъайи олимпиада кIули гъубшну.
Райондиъ кьюбпи ражари гъабхурайи олимпиадайин иштиракчйирихьна муниципалитетдин кIулиъ айи Мягьямед Къурбанов илтIикIнийи. «Табасаран райондиъ гьаму жюрейин олимпиада кьюбпи ражари кIули гъябгъюра. Уьлкейин машгьур вузди – М. В. Ломоносовдин ччвурнахъ хъайи МГУ-йи 2025-пи йисан 270 йисандин юбилей къайд апIиди. Гьадму йис улубкьайиз му олимпиада республикайин дережайиз удубчIвиди», — къайд гъапIну дугъу чан удучIвну улхбаъ.
Экономикайин илмарин доктор, профессор, МГУ-йин мялим Зейдулагь Юзбеговди Табасаран райондин глава Мягьямед Къурбановдин ляхниз заан кьимат тувну. «Райондин кIулиъ айир гележег образование айидарикан асиллу вуйивалин гъавриъ а. Гележегдиъ варитIан аьхю девлет зигьим хьибди, ва зигьимлу жигьиларихъди инсаниятдин артмиш’вал ярхлаз гъябгъиди. Амма кIваантIан зегьмет зигувал лазим ву», – гъапну дугъу.
Олимпиада ачмиш апIбан серенжемдиъ МГУ-йин делегацияйиз дахил шулайи мялимар – «Ачухъ образованиейин милли платформа» (НПОО) ассоциацияйин правлениейин председатель, Электрондин дакьатарин артмиш’валин центрин директор Денис Янышев ва дугъан заместитель Наталья Басилова иштирак гъахьнийи.
Денис Янышевди Хючна гъулан 1-пи нумрайин лицей меркездин образованиейин ужударсдар мектебарихъди тевнийи. УдучIвну гъулхдари къайд гъапIганси, мялимдин ва насигьятчийин йисан РФ-дин Правительствойи илимдин артмиш’вализ гизаф фикир тувра.
Олимпиадайиъ Табасаран райондин 38 мектебдиан 65 урхурайидар иштирак гъахьнийи. Тешкилатчйирин гафариинди, баяр-шубарин улихьна гьял апIбан бадали адагънайи табшуругъар, читинвалин дережайиз гъилигиш, МГУ-йин олимпиадйирин табшуругъариз барабар вуйи.
Урхурайидари гьял гъапIу табшуругъар комиссияйи ахтармиш апIбан кьяляхъ, олимпиадайин гъалибчйир мялум гъапIнийи. 10-пи классдиъ урхурайидарин арайиъ сабпи йишв Хючна гъулан 1-пи нумрайин лицейдиъ урхурайи Аьбдул Къурбановди, хъа 2-пи йишв Гурихъ гъулан кьялан мектебдиъ урхурайи Мадина Гьялимовайи гъадагънийи.
9-пи классдиъ урхурайидарин арайиъ 1-пи йишван сагьиб Хючна гъулан 1-пи нумрайин лицейдиъ урхурайи Сефият Гагаева гъахьнийи, хъа 2-пи йишв Гисик гъулан мектебдиъ урхурайи Мерзият Мягьямедовайи гъадабгънийи. 3-пи йишв Хючна гъулан 2-пи нумрайин мектебдиъ урхурайи Камалудин Сутриевди ва Табасаран райондин гимназияйиъ урхурайи Къурбан Ильясовди пай гъапIнийи.
Олимпиадайин гъалибчйириз Табасаран райондин администрацияйи тешкил дапIнайи пулсузди 3 йигъан Москвайиз гъягъюз ихтияр тувру сертификатар багъиш гъапIну. Думу йигъари баяр-шубар сабпи нубатнаъди М. В. Ломоносовдин ччвурнахъ хъайи МГУ-йиз гъягъиди, хъасин дурариз Москвайин культурайин ва тарихнан машгьур йишвариъ экскурсия гъабхиди.
Олимпиадайин гъалибчйир мялум апIбан кьяляхъ, Москвайиан Табасарандиз дуфнайи хялари, Дагъустан Республикайиъ онлайн (манзилнаъди вуйи) образование артмиш апIури, гизаф йисари баркаллу зегьмет зигбаз ва МГУ-йихъди аьлакьйир уьрхбаз лигну, профессор Зейдулагь Юзбеговдиз М.В. Ломоносовдин ччвурнахъ хъайи Москвайин гьюкуматдин университетдин терефнаан, вуздин ректор, академик В.А. Садовничийин къул алди, чухсагъул мялум апIбан кагъаз тувну.
«Табасарандин нурар» газатдин коллективдин терефнаан олимпиадайин тешкилатчйир ва гъалибчйир тебрик апIурача. Гъит ичв кIваъ айи ужудар хиялар кIулиз удучIври.
