Учу гъябгъюрайи вазлиъ чапдиан удубчIву «Табасарандин нурар» газатдин 14-пи нумрайиъ мялум гъапIганси, апрелин садпи йигъланмина Урусатдиъ хьадукран призывдин кампания ккебгъна. Жигьил баяр чпин ватандаш’валин буржи тамам апIуз Урусатдин Яракьлу кьувватарин жергйириз гъягъюра. Гьаму йисан призывдин комиссйириз 45 агъзуртIан артухъ баяриз дих дапIна. РФ-дин Генеральный штабди ва кьибла военный округдин штабди Дагъустан Республикайин улихь 4 агъзуриинакьан призывникар армияйиз гьаувалин план дивна.

 

 

23-пи апрелиъ хьадукран призывдин кампанияйин дахилнаъди респуб-ликайин призывникар уч шлу пунктназ Табасаран райондиан жигьил баярин сабпи десте гъафну.

Сабпи десте 6 касдикан ибарат вуйи. Дурар рякъюъ тIауз абйир-бабар, райондин администрацияйин, муниципалитетдин военный комиссариатдин гъуллугъчйир гъафнийи. Табасаран райондин военный комиссар Садикь Мурадялиевдин гафариинди, хьадукран призыв пландиинди кIули гъябгъюра.

«Армияйиъ гъуллугъ апIурайи йисан учву дявдин илимдиан аьгъювалар гъадагъну, дирбашди кIул за дапIну хулариз кьяляхъ гъюр кIури, умуд кивраза», – гъапнийи Табасаран райондин администрацияйин главайин жямяаьтлугъ хатIасузвалин ляхнариз лигру заместитель Ринат Мирзабалаевди.

Хьадукран призывдин кампания июлин 15-пи йигъазкьан давам хьибди. Табасаран райондиан 90 жигьил армия-йин жергйириз душну ккунду.

23-пи апрелиъ Урусатдин Яракьлу кьувватарин жергйириъ гъуллугъ апIуз Хив райондин культурайин, спортдин ва жигьиларин политикайин отделин кIулиъ айи Казбек Къазиевди чан байра рякъюъ тIаъну. «Ватандиз гъуллугъ апIру яв вахтра дуфна, Максим. Армияйиъ гъуллугъ апIувал – гъудуркьу жиларин ляхин, уьмриъ тувну ккуни саб имтигьян ву. Яв Ватан намуслувалиинди уьбх, дирбаш кьягьялси кьяляхъ хулаз гъач! Армияйиъ увуз вафалу, гьякьлу, дирбаш дустар алахьривуз», – гъибикIну Казбек Къазиевди чан телеграмм каналиъ.

Республикайин призывникар уч шлу пунктнаъ Урусатдин Федерацияйин Яракьлу кьувватарин жергйириз призывникарин сабпи пай гьаъбаз бахш дапIнайи серенжем кIули гъубшну. Митингдиъ тазади армияйиз гъягъюрайи 130-ртIан артухъ баяр иштирак гъахьну.

Баярин улихь удучIвну гъулху отставкайиъ айи полковник Явнуз Жанболаевди, Республикайин военный комиссариатдин ватандашар дявдин гъуллугънахьна гьязур апIру отделин начальник, подполковник Гьюсейн Уьмаргьяжиевди, военкоматдин гъуллугъчйири, призывникарин абйир-бабари армияйиз гъягъюрайи баяриз насигьятнан гафар гъапну, дурарикан, ужуди гъуллугъ дапIну, гьуркIу жиларси сагъ-саламатди кьяляхъ гъювал ккун гъапIну. Инженервалин кьушмарин лейтенант Э. Гиголянди къайд гъапIганси, частнан ихтиярназ гъафи баяр, чпик кайи кеспназ лигну, дестйириз жара апIиди ва дурариз дявдин пише улупуз хъюгъди.

Дагъустандин гьюкуматдин халкьдин мяишатдин университет ккудубкIнайи А. Даудовдизра армия-йин жергйириз дих дапIна: «Узу университетдиъ юриствалин образование гъадабгъунза, гъи дюн’яйиъ арайиз дуфнайи читин аьгьвалатнаъ армия-йиъ гъуллугъ апIувал чарасуз тамам дапIну ккуни ляхин вуйивалин гъавриъра аза. СВО гъябгъюрайи аьтрафариз учу гьаърадар. Далу терефнаъ дявдин операцияйиз душнайи ихь юлдшарин тереф уьбхидича. Гьамцдар фикрари ич жавабдарвал хъана артухъ апIура. Узухъди призывдин пунктнаъ таниш гъахьи вари баярин фикир гьациб ву», – гъапнийи дугъу.

Призывникар уч шлу пунктнан гъирагъдиъ чпин баяр рякъюъ тIауз дуфнайи, кIвак сикинсузвал кади ккилигурайи абйир-бабарра дийигънайи. С.Дажаевдин адаш Уьмаргьяжийи чан баликан ктибтнийи: «Бай чвлин призывдин вахтна армияйиз гъягъюз гьязур духьнайи. Амма спортдиин машгъул духьнайи вахтна ликриз иццру гъапIувализ лигну, бализ сагъ хьуз вахт тувнийи. Гьамус, сагъ хьпан кьяляхъ, учв военкоматдиз гъушну. Жилижвуву армияйиъ гъуллугъ дапIну, чан Ватан уьбхюз дудубгъну ккунду. Узура жигьил вахтна армияйиъ гъуллугъ апIури гъахьунза, армияйин кьяляхъ къанун уьбхру органариъ гъилихунза. Гъийин девриъ армияйиъ гъуллугъ гъапIу баяр аьшкьниинди ляхнариз гъадагъуру».
Армияйиз гъягъюрайи жигьил баярин дестейиз лигурайи, Мягьячгъалайиан вуйи Камил Мягьямедовди ватнадиз гъуллугъ апIбахьна вуйи чан рафтарин гьякьнаан узуз гьамци гъапнийи: «Хьадукран призывдиз узузра повестка гъафнийи. Хъа узу гьеле урхуб ккудубкIнадарза, диплом гъадабгъуз кьюб ваз имийиз. Узу университетдиан справка гъабхунза. Гьаддиз военкоматдиан узуз урхуб ккудубкIуз вахт тувну».

Армияйиъ чпин ватандаш’валин буржи тамам апIуз гъягъюрайи вари жигьилариз ягъурлу рякъ, рягьятди военный гъуллугъ тамам дапIну, сагъ-саламатди кьяляхъ гъювал ккун апIурача.