Апрелин аьхиримжи йигъан Хив гъулаъ РД-йин лайикьлу духтир Нариман Багъичевдин гьюрмат уьбхбаз Кьибла Дагъустанди районарин арайиъ волейболиан талитар кIули гъушну.
Талитариз Хив райондин администрацияйин гъуллугъчйир, гъунши районарин вакилар, турнирин тешкилатчйир ва спонсорар, ва гьацира хайлин тамашичйир гъафнийи.
Турнир ачмиш апIбан пайнаъ удучIвну улхурайидари Нариман Багъичевдин заан пишекарваликан, дугъан баркаллу ляхникан, ижми имандикан ва духтирвалин хусуси рюгьнакан, чан ляхнин юлдшарихьна ва иццурайидарихьна вуйи мани рафтарикан ва гьюрматнакан ктибтнийи. РД-йин лайикьлу духтир Нариман Багъичевдин чвйир Салават Мусаевди ва Гьиса Мягьямедовди чпин терефнаан волейболин турнирин тешкилатчйириз ва иштиракчйириз чухсагъул мялум гъапIнийи.
Турнириъ волейболин 8 команда иштирак гъахьну. Талитар кIули гъабан шартIариинди пешкешнан 4 йишв ва 4 номинацияйиан командйирин ужударстар спортсменар лишанлу апIувал тяйин дапIнайи.
Талитарин натижйириинди, сабпи йишваз Табасаран райондин команда, кьюбпи йишваз – Хив райондин Асккан АрхъитI гъулан команда, шубубпи йишваз Къурагь райондин, ва юкьубпи йишваз СтIал Сулейман райондин Куркент гъулан волейболин командйир лайикь гъахьну.
Мидланра гъайри, Табасаран райондин командайин вакилар Мягьямед Нуров ва Арсен Гюлмягьямедов «ВаритIан ужур йиврур» ва «ВаритIан ужур аьлакьачи» номинацйириъ, Къурагь райондин волейболин командайин вакил Эдгар Аьлибегов «ВаритIан ужур уьрхрур» номинацияйиъ ва Асккан-АрхъитI гъулан командайин спортсмен Фарид Ягибегов «ВаритIан ужур уйинчи» номинацияйиъ гъалиб гъахьнийи.
Волейболин турнирин гъалибчйир ва пешкешнан йишвар гъадагъдар кубокариинди, грамотйиринди ва пулиинди лишанлу гъапIну.
