Урусатди Украинайин аьтрафариин хусуси метлеб айи дявдин операция ккебгъхъанмина, магьа саки йисна гьацIкьан ву. Думу дявдин женгариъ фукьан табасаран баяр иштирак шулаш, фукьандариз Жуковдин, Суворовдин ччвурнахъ хъайи медалар, кьягьалвалин орденар тувнаш, саризра жиниб дар. Му дявдин операцияйиъ ихь миллетдикан 3 касдиз Урусатдин Игит ччвурарра тувну. Гьяйифки,Украинайин миллетчйирихьан Ватан уьбхюрча кIури, хайлин табасаран баяри му дявдиъ чпин жанарра фида гъапIну.
Гъи йиз макьалайиъ кьюб ражари Сирияйин дявдиъ, хъасин йистIан артухъ Карабахдин гьядисйириъ иштирак гъахьи, гьамусяаьт Украинайин аьтрафариин кIули гъябгъюрайи хусуси метлеб айи дявдин операцияйиъ иштирак’вал апIурайи, Дербент райондин Белижи гъулаъ яшамиш шулайи Табасаран райондин Куркакк гъулан агьали Шаир Мягьямедовдикан бикIуз ккундузуз. Мектеб ккудубкIбалан кьяляхъ, Шаир армияйиз гъягъюру. Чаин али буржи тамам дапIну, душв’ан гъюбан кьяляхъ, дугъу контракт йибтIну, Ставропол крайиъ айи Буденовск шагьрин дявдин частнаъ ляхин апIуз хъюгъну. ЦIиб вахтналан чан хушниинди Сирияйиъ гъягъюрайи женгариъ иштирак хьуз гъягъюру.
ГьацI йисандин арайиъ кьюб ражари гьадушван женгариъ иштирак хьпан кьяляхъ думу хъадакну контракт йибтIнайи частназ гъюру.
Сирияйиъ гъягъюри гъахьи дявдин гьядисйириъ иштирак хьпаз ва гьунарар улупбаз лигну, Шаир Жуковдин ччвурнахъ хъайи медалиинди лишанлу апIуру. ЦIиб вахтналан думу сад йисазди Карабахдиз гьаъру. Чан уьмриъ гьамцдар гьядисйир фукьан алахьнушра, гъира эскер, зат гучI дарапIди, Урусатди кIули гъабхурайи хусуси метлеб айи дявдин операцияйиъ иштирак шула.
«Йиз Ватан узуз ккилибгурайи вахтна, узхьан гъирагъдиъ гъузуз шуладарзухьан. 2014-пи йисанра узу му гьядисйириъ иштирак гъахьир вуза. Гьаддихъанмина дурар гьар йигъан яракьдиан йивбарикк, гьюжмарикк кка.
Учу, контрактдиин къул дизигну, ляхин апIурайи шубур гъардаш вуйча. 2014-пи йисанси, гьамусра учу шубридра, жвув’ин али буржи тамам апIури, Ватан уьбхбан женгариъ иштирак шулайча. Гьяйифки, улихьнаси кьялану гъардаш, хусуси метлеб айи дявдин операцияйиъ гъагъи зийнар духьну, саб вазлин арайиъ комайиъ имиди, хъасин кечмиш гъахьну. Хъа дидин хъял йиз кIваан гьич кам даршул. Ватан бадали, йиз гъардшин рюгь бадали, узу гьелелиг хъял алдабгъуз ккимиза», – кIура сюгьбатчийи.
Шаир эвленмиш духьнайир дар. Думу чан абйир-бабарин бицIину велед ву. Гьарсар дадайизси, му эскрин дадайизра чан велед улариз рякъюри, сагъ-саламатди гъвалахъ хъади ккунду. Аммаки, Ватан саб вуйивализ лигну, Шаири чаин али буржи намуслувалиинди тамам апIура. Дугъан асас вазифа разведка апIувал вуди, думу гьаммишан дявдин улхьан жергйириъ а. Чан уьмриъ думу Сирияйин гъягъи дявдиъ, Карабахдин гьядисйириъ иштирак гъахьир вушра, гъи Украинайиъ гъябгъюрайи хусуси метлеб айи дявдин операция дугъаз лап гъагъибси рябкъюра.
«Му дявдиъ хайлин узуз аьгъю баяр, йиз дустар, гъулан агьалйир йивну гъийихну. Узуз дурар гьарур Ватан бадали чпин жанар фида гъапIу игитар вузуз. Ич дадайи учузра, удучIвай гьадму ляхниан, дициб ляхин гьазкIа даричв, кIури, фукьан вушра гъапнийи. Аммаки узуз ва йиз гъардшариз дадаси, Ватанра ккундучуз. Гьаддиз, Ватан бадали, гъуллугъра давам апIурача. Учу дагъустанлуйир вуди, гъи жвуван Ватан читин гьялнаъ айи вахтна, дидиз кюмек дарапIди гъузуз шулдар.Фицики, Дагъустан гьарсаб вахтна чан кIубан баяриинди, мургу игитариинди машгьур регион ву. Гъира дагъустанлуйири чпи фужар вуш улупура. Гьаци вуйивализ лигну, гьаму дявди ухьуз 7 Урусатдин Игитарра тувну. Гьяйифки, игитарси гъийиху ихь баярин кьадарра цIиб дар. Дурарин варидин хъял учу алдабгъидича», – аьгьт апIура Шаир Мягьямедовди.
Гьамцдар дирбаш баяр ухьуз имиди, ихь Ватан гьич сабанра ккабгъидар. Гъит гьарсар дадайин бай му дявдин операцияйиан гъалибвал хьади ва сагъ-саламатди чпин хулариз кьяляхъ гъюри.
