Дагъустандин экономика за апIбак варитIан аьхю пай киврайи циркларикан саб – гъулан мяишатдин циркил ву. Республикайиъ гъулан мяишат йислан-йисаз артмиш шулайивализ лигну, мушваз ужудар пишекрарра лазим ву.
Дурарин гьязурлугвал за апIбан метлеб ади, цIиб улихьнаси Буйнакск ва Дагъустандин Огни шагьрариъ айи гъулан мяишатдин колледжар республикайин гъулан мяишатдин ва ипIру-убхъру сурсатарин минис-терствойин хиликкна тувну. Гьадрарихъди сабси гъулан мяишатдихъди аьлакьалу аьгъювалар туврайи образованиейин тешкилатариз артухъси студентар гъюбан ляхинра кIулиъ гъабхура. Му дигиш’валарин асас себеб – жигьилариз ляхин хьуб ва гьацира гъулан мяишатдин цирклиъ ужудар пишекрар артухъ апIуб ву.
Гьамусяаьт Дагъус-тандиъ гъулан мяишатдин цирклиъ уьмриз юрутмиш апIурайи инвестицйирин проектаризра ужудар пишекрар лазим ву. Му терефнаанра ляхин гъабхура. Гьаци, улихьнаси Дагъустандин Огни шагьрин гъулан мяишатдин колледждин выпускникариз чпихь лихуз теклиф дапIну, «ДЗИВ-2» ООО-йи ва «Полоса» ООО-йи дурар ляхнихъди тямин гъапIну. Гьамус му тажруба жара тешкилатарира ишлетмиш апIуз хъюгъна ва гъулан мяишатдин вузарин ва ссузарин выпускникар ляхниз гъадагъбан йикьрар йитIура.
Мисал вуди гъадабгъиш, цци хьадукран вазари Мягьярамкент райондин аьтрафариин али «Полоса» ООО мяишатдиъ Урусатдиъ гизаф бегьер тувру жихрарин варитIан аьхю багъ кивну. Дидин аьхюшин 55 гектар ву. Дагъустандин гъулан мяишатдин ва ипIру-убхъру сурсатарин министерствойин пресс-гъуллугънан кIулиъ айи Мягьямед Аьбдуллаевди тувнайи мялуматариинди, гьаму йисан чвлин вазари мяишатдиъ хъанара 30 гектариъсан жихрин багъ ибтуз планламиш дапIна, хъа багахь йисари багъдиз жара дапIнайи 200 гектариина адапIуз кка.
Мягьярамкент райондиъ сабсан инвестицйирин проект – «Сад» КФХ уьмриз кечирмиш апIура. Му мяишатдиъра 22 гектарин багъдиъ гизаф бегьер хру жихрин гъелемар кивра.
Натижа йивури, кIурзаки, гьарсаб аьхю мяишатдиъ ужудар пишекрар чарасуз лазим ву, фицики, заан дережайин, ужудар аьгъювалар айи пишекрар айивализ лигну, мяишатдин артмиш’валра ужуди улихь гъябгъюру. Хъа, гьяйифки, гьелелиг дурар республикайиъ бегьемди гьуркIну адар…
