Хив райондин Хив гъул’ан вуйи Зелимхан Пашаев 2023-пи йисан спортдин пауэрлифтинг жюрейиъ вари дюн’яйин кубок бадали вуйи талитариъ чемпион гъахьну. Думу июнь вазлин 11-12-пи йигъари Санкт-Петербург шагьриъ кIули гъушу талитариъ, Урусатдин регионарилан гъайри, Белоруссия, Чехия, Армения, Иран, Узбекистан, Таджикистан, Индия ва хайлин жара харижи гьюкуматарин 1500-тIан артухъ спортсменар иштирак гъахьну.
КIваин апIуз ккундучуз, Зелимхан Пашаевди апрелин вазлиъ Москва шагьриъ кIули гъушу Европайин талитариъ сабпи йишв гъадабгънийи. Учу думуган дугъкан «Табасарандин нурар» газатдиъ макьалара чап гъапIнийча.
Зелимхандин, пауэрлифтинг жюрейин спортдиан гьязурвалар гъахури, гьелелиг 3-4 йисра дубхьнадар. Думу тренер адарди, му жюрейин спортдиан интернетдиан аьгъювалар гъадагъбиинди гьязур гъахьну. Мидланра гъайри, думу гьязур шулайи спортдин залра ва душваъ айи спортдин алатарра деврин тIалабариз жаваб туврудар дар. Амма ихь бали, сабдихьанра гучI дарапIди, вари дюн’яйин чемпионвалин титул гъадабгъуз кьаст дивну. Ва дугъу чан гаф кIулиз адабгъну.
«Улихьнаси гъабхьи Европайин чемпионатдихь тевиган, вари дюн’яйин Кубок бадали вуйи талитар читинди алахьунзуз. Му талитариъ иштиракчйирин кьадарра аьхюб вуйи, тIалабарра – ижмидар. Узу гьаму талитарихьнара тренерин кюмек адарди, ялгъузди гьязур гъахьунза. Европайин чемпионатдиъси гьамусра хайлин тренерарихьан теклифар гъюразуз. Магьа гъира Индияйин ва Ирандиъ тренерари, Урусатдин регионарин командйирин тренерари зенгар гъапIунзуз ва узуз чпихьна гъюз теклифар дивра. Гьелелиг жара уьлкейиз вая региондиз гъягъюз фикир апIурадарза. Хъа теклифар ужудар мумкинвалар туврудар ву», – гъапнийи ич сюгьбатнаъ Зелимхан Пашаевди.
Талитариъ Зелимханди гъалибвал гъадабгъбалан гъайри, чан гъагъишнан категорияйиъ 175 кило гъагъ за апIбиинди вари дюн’яйин рекорд дивну. 2023-пи йисаз рекорддин варитIан заан улупбар 130 кило вуйи. 7-8 йисандин арайиъ му улупбар саркьан спортсмендихьан зиина адауз гъабхьундар.
Фунур вушра спортсмендин хъуркьувалар юкIв хъади ва ижмишнаан гъахури гъахьи гьязурваларин ва тренировкйирин натижа ву. Гьаци ихь спортсмендинра.
«Вари дюн’яйин талитар телевидениейин прямой эфириъ улупури гъахьну. Дурариз йиз дустар, гъуландар, майил-мадатар вари узхъан юкIв убгурайи инсанар лигурайи. Гъалибвалин пьедесталиина узу удучIвубси, йиз дадайихьанна адашдихьан зенг гъафнийзуз. Дадайиз узу аьхю кьадар гъагъ за дапIну ккундар. Амма дурар йиз гъалибвалиин разиди айивал ва уз’ин дамагъ апIурйивал гьисс гъапIган, узу хъана гужал гъахьиганси гьибгънийзуз. Гьаддиз, кIурза, уьмрин рякъюъ абйир-бабарин гафну важиблу роль уйнамиш апIуру.
Хъа спорт узу йиз уьмрин асас бинаси, маракьлу ляхинси, гележегдин кьувватлу рякъси гьисаб апIураза. Гьамцдар заан дережайин талитариъ хъуркьувалиинди иштирак хьувалиин разиди вуза. Саб бицIи вахтна рягьятвал гъадабгъну, тренировкйир давам апIуз ва цIийи хъуркьувалар гъадагъуз хъюгъюз планарик кайиз», – гъапну спортсменди.
Хив райондиъ Зелимхан Пашаев къаршуламиш апIбан мажлисариз гьязур шула. Хъа учу ич терефнаан дугъаз чан кIваъ айи планар тамам хьувал ва гележегдиъ хъана заан натижйирихъ хъуркьувал ккун апIурача.
