13-пи июндиъ «Урусатдин Игит» ччвур тувнайи генерал-лейтенант, Луганск Халкьдин Республикайин Игит, Аь. Къадировдин ччвурнахъ хъайи ордендин эйси ва жара медаларинна орденарин сагьиб, Ригъ алабхъру терефнан дявдин округдин кьушмарин командующийин заместитель Эседуллагь Абачевдин бабкан духьну 55 йис тамам гъабхьну.
Игитрин юбилей багьна дубхьну, кюкйирин кунцI ва чайрахъна меълишнарра хьади, нубатнан ражари Эседуллагь Абачевдин дадайиин улукьуз Хив райондин глава Ярмет Ярметов Зилдиккна хялижвди гъафнийи. Дугъахъди Хив райондин культурайин, спортдин, жигьиларин политикайин ва туризмдин отделин кIулиъ айи Казбек Къазиев, Зилдикк гъулан глава Имамудин Мягьмудов ва улупнайи гъулан мектебдин директор Фейтуллагь Аьшурбеговра хъайи.
Мани ялав айи Угълан бабан хулаъ хуш-беш апIбалан ва чай убхъбалан кьяляхъ, райондин главайи, дугъан сагъламвалин гъайгъушнаъ, гьацира миди вуйи ляхнар-карарин гъаразнаъ ади, суракь гъапIнийи.
Угълан бабра, халис табасаран дишагьлиси, хялар гъюб’ин кьадарсуз рази гъахьнийи.
– Чухсагъул, жан баяр. Нубатнан ражари учву йиз суфрайихъ рякъбиин кьадарсуз рази вуза. Ихь сюгьбатну хайлин юкIвра улдубчIвуз гъитнийиз. Кьувват ва мюгькам сагъ’вал тувричвуз. Хъугъай, (ишуб кади) дявдин майдандиан худул ва баяр гъафиси гъабхьунзуз. Аферин. Гъи узу, йиз хизан-кюлфет бадали алдагъу ликар Первердигари гьяждиз гъушганси гьисабназ гъадагъри ичв. Вушра, кьюд йигъак сабан ичв ляхин-карназ манигъ’вал туври, бизарра махьанай, жан баяр. Йиз яшариз гъилигиган, фукьан вушра ужуди вуза. Валлагь, гьаму кабхьнайи цIа кутIубшвну, дявйир, кчIихбар, улхбар-рахбар, йивбар-йихбар сарун имдар, гъийихъанмина дюн’яйиъ айиб ислягьвал ва кIул’ин алтIабгнайи укIу зав ву кIуруб гъабхьнийиш, хъугъай, хъайигъан уьмриан гъушишра, баладайиз, – гъапнийи Игитрин бабу.
– Дюн’яйиин ислягьвал ва кIул’ин аку зав гъабхьиган, уву наана гьялак шулава, Угълан баб? – зарафат кади гъапи Ярмет Ярметовди, Угълан бабаз жаваб туври. – Ихь мулкариин увусир игит дишагьли, дада ва баб хьувал учуз нумуна вучуз. Гъи яв баяри ва сану худлира кмиди ихь закурин йигъ бадали хаин душмнихъди дяви гъабхура. Йиз, райондин администрацияйин ва агьалйирин, депутатарин корпусдин терефнаан уву баяриз тувнайи ватанпервервалин тербияйиз аферин ва икрам, Угълан баб!
КIваин апIуз ккундузуз. Угълан баб 1941-пи йисан Хив райондин Зилдикк гъулаъ бабкан гъахьну. Дугъан байвахт фициб гъабхьнуш, думу бабкан гъахьи йису субут апIура. Дугъу чан дердар-гъамар накьдизкьан урхури имбу такабур халачйириъ, гьалвариъ ва кюмсериъ атIагури ими. Угълан бабу чан уьмрин юлдаш Аьбдулмуъмин Абачевдихъди (думу уьмриан душну магьа ургуд йис шула) 10 велед духну (ургур бай ва шубур риш), дурар баркаллувалиинди арайиз адагъну, дурар эвленмишра гъапIну. Угълан бабкан сарун фукIара ктидибтишра, гьаму чIяаьн даринхъа?
Гъи ихь уьлкейин азадвал бадали дугъан баяр Эседуллагьди, Исабегу, Вадимди ва худли Арсенди (Эседуллагьдин бай) душмнин гюллихь мухур гьивна. Гъит ихь вари баяриз Аллагь кюмек ишри. Аргъаж шулайи насил му ирснан ва тарихнан гъадри ибшри.
