Гьаму йигъари РД-йин Халкьдин Собраниейиъ Дагъустандин Главайин вари ихтиярар айи вакил Нюсрет Уьмаров Сергей Меликовдин табшуругъниинди, Табасаран райондин глава Мягьямед Къурбановдихъди сатIиди Табасаран райондин Хюрикк гъулаъ тикмиш апIурайи цIийи мектебдин дараматарин тикилишчивалин ляхнарин аьгьвалат ахтармиш апIуз гъушну.

 

 

КIваин апIуз ккундучуз, Хюрикк гъулан йирси мектеб аварийный гьялнаъ айибси гьисаб дапIна, гъи душваъ бицIидари шубуб сменайиъ урхура. ЦIийи мектебдиъ сабишв’инди 500 баяр-шубариз урхуз мумкинвал хьибди. Хьуб корпусдикан ибарат вуйи думу мектеб «Образование» милли проектдин дахилнаъди тикмиш апIурайиб ву.

Гъубшу йисан декабрин вазлиъ Табасаран райондиз РД-йин Правительствойин председатель гъюбан кьяляхъ, тикилишариин лихурайидарин кьадар артухъ гъапIнийи. Гьамусяаьт душв’ин 25 кас лихура. Тикилишчйири кьюб корпусдин цалар дивну, гьаму йигъари дурариин гъваар иливуз хъюгъди. Гьаддихъди сабси имбу корпусарин цаларра тикмиш апIбан ляхнар гьяракатнаъ а.

Нюсрет Уьмаровди ахтармишар гъахбан кьяляхъ, мектеб документариъ улупнайи вахтназ абццбан бадали, тикилишчивалин ляхнарин ери ис хьуз гъидритди, тикмиш апIувалин гьяракат зарб дапIну ккуниваликан гъапнийи.