Гъубшу гьяфтайиъ Дербент шагьриз Урусатдин Президент Владимир Путин гъафну.
Республикайиз дуфнайи Президентди СКФО-йин республикйириъ туризмдин циркил артмиш апIбан гьякьнаан совещаниера кIули гъубхнийи. Дидланра савайи, Владимир Путин Нарын-гъалайиина, Дербентдиъ айи жвумийин гъудган апIру тарихи мистаз ва Низами Гянжевийин ччвурнахъ хъайи, фонтанар айи паркдиз гъушнийи. Паркдихъди таниш хьпан кьяляхъ, уьлкейин Президент дина дуфнайи шагьрин агьалйирихъди гюрюшмиш гъахьну. Президент гъюрайиб аьгъяди, душваъ инсанар сяътариинди дугъаз ккилигури гъахьну. Гьадрарин арайиъ бицIи риш Раисат Акиповара айи. Паркдиъ инсанар гизаф айивализ ва вари сабишв’инди Президентдилан илтIишнайивализ лигну, му шураз Владимир Путин гъяркъюндар. Учв яшамиш шулайи багъри шагьриз дуфнайи уьлкейин Президент гъяркъюндариз кIури, бицIи риш, яманди кефйир дюргъну, кIваантIан ишуз хъюгъру.
Йикь илипну ишурайи шуркан видео гъябкъган, Владимир Путинди, бицIирин мурад-метлеб кIулиз адабгъбан бадали, Раисатдизна дугъан абйир-бабар Аьгьмед ва Култум Акиповариз саб гьяфтайилан чахьна Кремлиз дих апIуру.
Президентди Раисат чав ляхин апIурайи кабинетдиъ учв дуснайи креслойихъ дитру. Владимир Путиндихъди сатIиди Раисатди Урусатдин Правительствойин председатель Михаил Мишустиндиз зенг дапIну, думу наан аш, ахтармиш апIуру. «Ляхниъ аш, дарш хуррамди наанкIа лицураш аьгъю апIурача», аьлхъюри гъапнийи уьлкейин кIулиъ айири. М.Мишустиндихъди гаф-чIал апIбан кьяляхъ, В. Путинди ва Раисатди, Урусатдин финансарин министр Антон Силуановдизра зенг дапIну, Дербент шагьрин артмиш’вализ федеральный бюджетдиан 5 миллиард манат жара апIуб ккун гъапIну.
Мидин гьякьнаан Дагъустандин Глава Сергей Меликовди гьамци гъапну: «Гъи Владимир Владимировичди ухьу ва ихь респуб-лика бадали ужуб къарар кьабул гъапIну, фицики, гьамусяаьт уьлкейин аьгьвалат читинуб вушра, хъюгънайи ляхин давам дапIну ккунду. Гьадму гьисабнаъди Дербент шагьрин агьалйир ва дина гъюрайи хялар яшамиш хьуз ужудар шартIарихъди тямин апIувал чарасуз лазим вуйивализ лигну, тикмиш апIуз ккергънайи яшайишдин тикилишар аьхирихънара духну ккунду. Дагъустандихьна ва мушваъ яшамиш шулайи агьалйирихьна гьамци янашмиш хьувализ увуз, Владимир Владимирович, чухсагъул».
Дербентдиан вуйи Раисатдихъди Москвайиъ Сергей Меликовра, Сулейман Керимовра гюрюшмиш гъахьну.
Шурахъди ва дугъан абйир-бабарихъди вуйи гюрюшдиъ Сергей Меликовди веледар гьамци ватанпервервалиинди, жвуван бицIи ва аьхю ватанарихьна, президентдихьна ккунивал ади тербияламиш апIбаз Раисатдин абйир-бабариз ва гьацира бицIи дагълу шурахьна гьамци янашмиш хьпаз уьлкейин Президентдизра чухсагъул мялум гъапIну.
