Хючна терефнаан Хюрикк гъулан гьацIкьялаз гъюру рякъюъ Ис нир’ин али гъяд ишлетмиш апIуз шлу гьялнаан удубчIвурайи. Думу абхъбаан хатIалу дюшюш арайиз гъюбан мумкинвал айи. ДумутIанра савайи, гьаму йигъари Хан’ил участокдиъ айи Хюриккна гъюру рякъ жара шулайи йишвхьан гъулан кьялазкьан рякъ’ин асфальт улубзбан ляхнарра цIийикIултIан башламиш aпIypa. Думу ляхнар гъулахъна гьяйиз, му гъяд лазим вуйи къайдайиз хувал чарасуз лазим вуйи.

 

 

«Хюрикк сельсовет» СП-йин Аьлибег Сеферов кIулиь ади, гъулан жямяаьтдин гьевескрар вуйи Шарафудин Рамазановди ва Ризахан Хачмазовди, лазим вуйи тикилишдин материалар гьязур дапIну, му гъяд къайдайиз хпан серенжем тешкил гъапIнийи. Му серенжемдиъ гъулан жямяаьтдин аьхю кьадар вакилар иштирак гъахьну ва дурари гъяд рас апIбан кIули гъухну.

Узуз му ляхниъ активвал улупу саб кьадар тикилишчйирин ччвурар ктухуз ккундузуз. Магьа дурар: Ш. Рамазанов, Р. Хачмазов, Гь. Гъамбаров, Ш. Мягьямедов, М. Аьлиханов, Аь. Аьзизов, Гь. Аьлимирзаев, Н. Исмяилов, Гь. Мягьямедов, Аь. Аьлиев. Гьамрари ва хъана жарадари, йигънура, йишвнура сяаьт 12 хьайиз зегьмет зигури, му ляхин заан дережайиъди кIулиз адабгъну. Зиихъ кудухнайидарин ва гизаф кьадар жара касарин кюмекниинди гъяд’ин бетон улубзну, душв асфальт иливуз гьязур гъапIну ва гъядун гъирагъарихъди турбйирин мюгькам мягьражар иливну.

Гъулан жямяаьтди ва «Хюрикк сельсовет» СП-йин администрацияйи му ляхин тамам гъапIу касариз чухсагъул мялум aпIypa. Дурариз варидариз мюгькам сагъ’вал, хизанариъ хушбахтвал, ужувлар ва шадвалар хьуб ккун aпIypa. Баркаллагь чпиз, Аллагьди уьрхри чпи.

 

Шиклиъ: ляхин тешкил гъапIу гъулан агъсакъларин ва устйирин десте.