Улихьна йигъари хайлин вахтна йиз багъри Бургьанкент гъулан мектебдиъ мялимди гъилиху, варидариз гирами, гьюрматлу кас Аьзизбег Шихмягьямедов кечмиш гъахьну кIури, пашман хабар кубкIнийзук. Саб гьяфтайин арайиъ, Аьзизбег Рамазановичдикан макьала бикIуб ккун апIури, дугъан хиликк гъурхдари телефондиз хайлин зенгар гъапIнийиз.
Аьзизбег Рамазанович Шихмягьямедов Табасаран райондин Дашлукент гъулаъ Ватандин Аьхю дяви ккудубкIу 1945-пи йисан бабкан гъахьну. Мицир кас сарун даршул. Аьзизбег Шихмягьямедовди чав дарс киву гьарсар бицIирин кIваъ кIваълан дурушру ужудар фикрар, хиялар гъитну. Думу кечмиш гъахьну кIури гъеебхьган, дугъу дарс киву баяр-шубарихьан ишуб дебккуз гъабхьундайи. Варидариз гьяйиф гъахьи мялим 78 йисан яшнаъ ади уьмриан гъушну. Дугъу узузра дарсар кивнийиз, ва узу дугъахъди йиз багъри мектебдиъ йицIихьуд йисанкьа гъилихнура вуйиза.
Аьзизбег Рамазанович аба-баб хътрудариз аба, гъардаш адруриз – гъардаш вуйи, мясляаьтчи, насигьятчи, гъвалахъ хъайи гъуншдинкьан хатур ккибтур дайи, мялимарин коллективдиъра дугъаз аьхю гьюрмат айи.
1966-пи йисан кьибла Дагъустандиъ ижмиди жилир гъутIурччвиган, Бургьанкент гъулан гъуншдиъ айи Хюлюгъ ва Дашлукент гъулар саки гъадаргънийи. Думу гъуларин бязи агьалйир Бургьанкетдиз кючмиш шулу. 1968-пи йисан январиъ душваъ мектебдин дараматар дивну ккудукIнийи. Ва, гьелбетда, цIийи мектебдиз ужудар мялимарра лазим вуйи. Думу йисан Аьзизбег Шихмягьямедовди Мягьячгъалайиъ ДГУ-йин химияйин ва биологияйин факультетдин аьхиримжи курснаъ урхурайи. Факультетдин кIулиъ айидари, дугъан заан аьгъювалариз гьюрмат апIури, Аьзизбегдиз вуздиъ ляхин апIури гъузуз теклиф апIуру. Амма, учв хизандиъ бицIину бай вуйивализ лигну, абйир-бабарин багахь гъузну ккундийи, ва думу 1968-пи йисан сентябрин вазлихъантина гъулаъ мялимди лихуз хъюгъну.
Аьзизбег Рамазанович дин хиликк агъзрариинди баяр-шубари аьгъювалар гъадагъну. Химияйиан ва биологияйиан дарсарра думукьан рягьтидар дар, амма дугъу чан дарсар рягьят къайдайиинди кивуйи. «Лиг, уву алабхьурайи палатдикра, ипIурайибдикра, вари ухьу хулаъ ишлетмиш апIурайи шей’арикра Д. Менделеевди дюзмиш гъапIу химияйин элементарин вари таблица ка, анжагъ думу жара къайдайиинди дюзмиш дапIнайи вахтна, гъавриъ ахъуз цIибди читинди алабхъурахьуз. Хъа ужуди фикир гъапIиш, думу гизаф гъулай ва маракьлу дарс ву. Му дарсназ цIиб артухъди фикир тувну ккунду, йиз баяр-шубар», – кIуйи Аьзизбег Шихмягьямедовди. «Жан бай» ва «жан риш» хътарди саб гафкьан апIурдайи, хул’ан читинвал кайи баяр-шубарин себеб тяйин апIуз абйир-бабарихьна хулаз гъягъюйи. Ва читинвал ади гъабхьиш, насигьят тувну, мясляаьтниинди вари албагуйи. Дугъан дарсназ мектебдиъ урхурайи бицIидар гизаф ккилигури шуйи.
Табасаран райондин образованиейин управлениейин терефнаанра Аьзизбег Шихмягьямедвдиз ужуб гьюрмат айи. Аьзизбег Шихмягья-медовди гъизигу фидакар зегьмет мектебдин улихь-кIулихь хьайидарин, райондин УО-йин, республикайин образованиейин ва илимдин министерствойин терефнаан хайлин гьюрматнан грамотйир тувбиинди лишанлу дапIна. Дугъу дарс киву баяр-шубари ихь уьлкейин жюрбежюр йишвариъ духтрарди ва жара гъуллугъариъ ляхин апIура. Мисалназ, гьамусяаьт Дагъ. Огни шагьрин ЦГБ-йин кIулин духтирди лихурайи Максим Гьяжимягьямедовдизра дугъу дарсар кивну Аьзизбег Рамазанович Урусатдин халкьдин образованиейин гьюрматлу гъуллугъчира ву.
Гьяйиф, мицисдар мялимар ихь арайиан гъягъюб! Бургьанкентдин мектебдиъ гъурху вари ихь ватанагьлийири Аьзизбег Шихмягьямедовдин хизандиз, мирас-варисдиз башсагълугъвал мялум апIура.
