Майин 31-пи йигъан «Дагъустан» РИА-йин пресс-конференцйир гъахру залиъ Республикайин кьюбпи нумрайин клиникайин больницайин кIулин духтир Ибрагьим Мягьямедовди республикайин журналистарихъди пресс-конференция кIули гъубхнийи. Пресс-конференция Мягьячгъала шагьрин М.Гьяжиевдин ччвурнахъ хъайи кючейиъ ерлешмиш дубхьнайи Республикайин медицинайин центрин – ветеранарин госпиталин бинайиин Республикайин 2-пи нумрайин клиникайин больница яратмиш апIбан меселайиз бахш дапIнайиб вуйи.
Чан улхбаъ Ибрагьим Мягьямедовди къайд гъапIганси, республикайиъ 60 йистIан артухъ яш дубхьнайи 40 агъзур кас яшамиш шула, дурарик Ватандин Аьхю дявдин ветеранар, жюрбежюр дявйирин гьядисйирин ва зегьметнан ветеранар кахьра. Мидланра гъайри, Дагъустандиъ дявдин ветеранарихъди барабар дапIнайи 10 агъзуртIан артухъ инсанарра а. Дурарин варидарин медицинайин гюзчивал гъабхуб лазим ву.
«Гьаддиз ич идарайи гьаму вари вазифйир тамам апIури ккунду. Мидланра гъайри, гьамусяаьт ихь уьлкейиъ «Демография» кIуру программа уьмриз кечирмиш апIура. Думу программайин айитI яшлу касар уьрхбан гьякьнаан вуйи месэлйирин аьхю пай а – 60 йистIан артухъ яш дубхьнайи касарин чарасуз вуди диспансеризация апIувал, гьар йисан медицинайин ахтармишар гъахувал, дурариз яшайишдиъ арайиз дуфнайи цIийи шартIарихъди вердиш хьуз кюмек тувувал ва гьацдар жарадар. Милли проект «Демография» уьмриз кечирмиш апIбан сяргьятариъди клиникайиъ яшлу касариз гериатрияйин отделениера абццна. Гъи яшлу касарин бедендин гьендемариъ арайиз гъюрайи къайдасуз уьзрар ахтармиш ва сагъ апIру медицинайин пишекрар а», – къайд гъапIну Ибрагьим Уцумиевичди.
Ибрагьим Мягьямедовди Республикайин медицинайин центр Республикайин клиникайин больницайиз гьаз илтIибкнIушра ктибтнийи.
Республикайин медицинайин центрик гьаруб кIул’инди вуйи шубуб жа-жара идарйир кади гъахьну – больницара хъади поликлиника, ветеранарин госпиталь ва гериатрияйин центр. Душван гьарсаб идарайиъ чан кIулин духтир, дугъан заместителар ва гьацдар жара гъуллугъчйир айи. Мидланра гъайри, дурарин зиин медцентрин руководителра алди гъахьнийи. Гьамус душваъ 1 кIулин духтри 2 дугъан заместителари (сар – больницайин, тмунур – поликлиникайин) ляхин апIура. Гьамциб жюрейиинди идара апIру кадрйир ва дурариз удучIвурайи харжар саб къайдайиз гъахну. Мидихъди сабси, документарихъди ляхин апIувалиъра гъулайвал гъабхьну.
«Пуз ккундузузки, гъи ич идарайин урологияйин отделениейиъ инсандин бедендин айтIан гьендемарин (гурдмарин, жвуран гаргрин, фунин, рудрарин ва гь.ж.) хатIа ктру ва хатIалу гъяргъю йишварин операцйир хъуркьувалиинди апIура. Гинекологияйин отделениейиъ дишагьлийирин гележегдиъ онкологияйин уьзрарихьна хуз мумкин вуйи ва жара хатIалу уьзрар сагъ апIура. Гъи учуз айи гъийин деврин медицинайин авадлугъари, лазерин ва плазмайин технологйир ишлетмиш апIури, саки зийнин лишан адарди, ифи удудубчIвди, я гележегдиъ иццрушнан чIуру натижйир адарди ва ужуб ерийиинди заан технологияйин операцйир тамам апIуз мумкинвал тувра. Мурар, улихьди адру, гъийин деврин аьхю меселйир ву», – къайд гъапIнийи кIулин духтри.
Гележегдиз вуйи планарикан улхури, Ибрагьим Уцумиевичди багарихьди РБК гъийин деврин цифрайиинди либхурайи регистратурайихъди, операцйир апIру цIийи блокдихъди тямин апIруваликан гъапнийи, ва гьацира рентгенологияйин, кардиологияйин, эндоскопияйин ва хирургияйин цIийи авадлугъар масу гъадагъузра пулин дакьатар жара дапIнайиваликан ктибтнийи.
