Майин 31-пи йигъан Дербент шагьриъ Исламдин аьгъювалар тувру «Бабуль-Абваб» центриъ яркьу ифтар – ушв гьибтувал кIули гъубшну. Мина вари Дагъустандиан, Чечен Республикайиан, Ингушетияйиан, Азербайжандиан ва Таджикистандиан дуфнайи хяларин кьадар аьхюб вуйи.

СатIиди ушв гьибтувал Дербент шагьрин администрацияйин кюмекниинди, «Бабуль-Абваб» тешкилатди тешкил дапIнайиб вуйи. Серенжмедиъ Дербент шагьрин администрацияйин главайин сарпи заместитель Рустамбег Пирмягьямедов, вахтназ вуди Дербент райондин главайин вазифйир тамам апIурайи Сеидмягьямед Бабаев, Табасаран райондин глава Мягьямед Къурбанов, Ахты райондин депутатарин Собраниейин председатель Аьбдулкерим Палчаев ва гизаф жарадар иштирак гъахьнийи. Уч духьнайидар кьабул апIбан гаф хьади, Дербент шагьрин Тарихи Жвумийин мистан имам шейх Исамудин Эфенди удучIвнийи. Дугъу хялариз, гьаму сабабнан ляхниъ иштирак шулайивализ, чухсагъул гъапIнийи, багарихьди улубкьурайи ушварин машкврихъди тебрик гъапIнийи, гьарсар мусурман касдиз Гирами Рамазандин вазлин важиблуваликан, ушв дибиснайириз ушв гьибтуз уьл гьивбан сабабнакан ктибтнийи.