Шаввалин ваз Рамазандин вазлин кьяляхъ гъюрайиб ву. 1-пи Шавваль машкврин йигъ шулу. Му йигъан ушв бисувал гьярам дапIна. Хъа му йигъхъан тина вуйи 6 йигъан ушвар дисувал лап ижми сунна ву.
– Саб вазли ушвар дидисну, машкврин кьяляхь хъанара ушвар дисувалин гьикмат фициб ву?
– Гьикматар гизаф а. Дурарикан саб – вазлин арайиъ ушвар гъидисдарин хурагнахьна ужуб иштагьвал ади шулу, ва му саягънаъ ади ушвар дисувал хъана давам апIуб нефсдиз гъагъи ляхин ву. Гьаци вуйиган, Аллагьдиз табигъ духьну, чан нефсдиз къаршу гъахьиш, мидин сабабра аьхюб шулу. Рамазандин вазлин вари ушвар ва Шаввалинра 6-сана ушв гьисаб гьапIган, 36 ушв шулу. Абу Аюб аль-Ансарийихьан вуйи гьядисдиъ дупна: «Шли Рамазандин вазлиъ вари ушвар дидисну, хъасин шавваль вазликанра 6 ушв гъидисиш, дугъаз вари йисан ушвар гьидисгансиб сабаб шулу» (Муслим).
– Хъа эгер Рамазандиканна Шавваликан дарди, жара вазариъ 36 ушв гьидисиш, сад йисан гъидисгансиб сабаб шулин?
– «Бужайрами» китабдиъ дибикIна: «Эгер Рамазандин вазлиъ ушвар гъидисиш, хъасин Шаввалиъра – 6 ушв, сад йисан фарз ушвар гъидисгандинсиб сабаб шулу. Эгер 36 йигъан Рамазандикан ва Шавваликан дарди гъидисиш, думуган сад йисан суннат ушвар гъидисубсиб сабаб шулу».
– Рамазандин вазли ушвар дидрису касдиз Шаввалин суннат ушвар дисуз хай шулин?
–Му суалназ аьлимари гьамциб жаваб тувра: «Эгер дугъу ушвар саб себеб ади гъидисундарш, дугъаз Шаввалин ушвар дисуб суннат ву, амма дугъаз вари йисан гъидисгансиб сабаб хьибдар. Хъа эгер дугъу саб себебра адарди Рамазандин вазлин ушвар ккадаънуш, дугъаз Шаввалин вазлин суннат ушвар дисуб гьярам ву, гъаз гъапиш сифте дугъу саб себебра адарди ккадау ушвар кьан дарапIди кьаза дапIну ккунду. Яна, Шаввалин вазлин кIулариан хъюгъну, дугъу ккадау фарз ушвар кьаза дапIну ккунду. Шаввалин вазли ушвар чиб-чпихъди хъирчну даршра дисуш шулу, амма, машквар йигъхъан хъюгъну, 6 ушв сатIиди дисуб ужу ву.
Шаввалин ваз ккудубкIиган, му суннайин вахтра ккудубкIуру. Гьаци вушра, Шавваль вазлин кьяляхъра му суннатар кьаза апIуб ужу ву.
«Бужайрамийиъ» хъана дибикIнаки, эгер гьаму суннат ушварианди ккадау фарз ушвар кьаза апIури гъахьиш, Шаввалин суннат ушваринра сабаб шулу.
Гьит, Аллагьди ухьуз му суннайихъан ижмиди хъчIихуз тавфикьвал туври! Амин!
«Ассалам» газатдиан
