14-пи июль – почтайин Йигъ
14-пи июль вари Урусатдин почтайин Йигъси къайд дапIна. Му йигъ гьисабназ гъадабгъну, узу Хив гъулан почтайин отделениейиз хялижв гъахьнийза ва му идарайин начальник Рашид Рашидовдихъди сюгьбат гъубхнийза. Сюгьбат жикъиди исихъ чап апIурача.
‒ Рашид Аьгьмедханович, гъийин йигъаз уву регьбервал туврайи идарайин гьял фициб ву?
‒ Хив райондиъ варитIан аьхю коллектив ичуб ву. Коллектив гизаф ужуб, сар-сарихьна гьякь-гьюрмат, мясляаьт айиб вуйич. Улихьдиси дарди, гъи кIул адабгъуз даршлукьан гизаф кIажарин ляхин ачуз. Гъирагъдилан гъюрайи кагъзар (узу дурариз саламарин кагъзар кIури шулза) ктарди, гъулариан гъюрайи газарин, акварин гьякъи тувбан, рякъяриъ машинариин илитIу журумарин кагъзарра кмиди гъи ич ляхин дубхьна. Вушра, мициб коллектив хъимбукьан гагьди, узуз гучI`вал ктарзуз. Йиз коллективдиз чухсагъул мялум апIураза!
‒ Газатар-журналариз подписка апIбан гьякьнан фициб ляхин гъабхурачва?
‒ Му месэла, валлагь, гизаф читинуб ву. Подписка апIувал гизаф зяифди гъябгъюра. Гъадабгъиш, ихь республикайин «Табасарандин нурар» газат, вари ихь райондиъ 584 газаттIан подписка дапIнадар. Эгер райондин главайин ва образованиейин тешкилатарин терефнаан кюмек гъабхьундайиш, гьаму кьадарра хьуб мумкин дайи. Хъа вуш-дарш газатдиз подписка апIин кIури, илзигузра даршул, аьхир.
‒ Хъа прессайихьна мициб янашмиш’вал гьаз а пну, фикир вуяв?
‒ Гъи мектебдиъ урхурайи баяр-шубарира кмиди интернетдин тереф дибиснайиб варидиз ашкара вухьуз. Ав, жвуваз герек вуйи, хайир кайи ляхин дилинра абгуз, ишлетмиш апIуз шулу. Хъа мукьанра хилиз художествойин китаб ясана газат-журнал гъададабгъуз, подписка дарапIуз хайир даршул, аьхир. Валлагь, йиз баяр-шубаризра, ярар-дустаризра кмиди гьарган кIурайиб вуйиз. Китабдихъ, газатдихъ ургуб интернетра гьюдюхюз ният дарапIарза. Дурарихъан гьаммишандиз гъюрайи аьтирин ниъ, зат йирси даршлу ва вахт дурубшру макьалйир гьарган багьа вузуз!
‒ Гъийин йигъандин «Табасарандин нурар» газат фици рябкъюравуз?
‒ Узу ляхин апIуз хъюгъю сифте йисариси дарди, гьамус газат лап такабур дубхьна. Фицики, дидин машариъ гъулариъ айидарин дуланажагъдикан, аьгьвалатнакан бикIура. Дургъунагъар, абйирин гафар ва мисалар, кроссвордар чап апIура, ихь халкьдин такабур халачйирикан, милли хурагарикан ктибтура. Мидланра савайи, урус чIалниинди вуйи «Годекан» кIуру газатдиъ чап апIурайи му къайдайин материаларра лап иштагьниинди урхуз шулу. Гъит, газатдин гъуллугъчйириз хъана ужудар сяътар, хъуркьувалар ишри!
‒ Яв фикриан, подписка хъана артухъ апIбан бадали, фу дапIну ккунду?
‒ Гъулариъ айи почтайин отделенйириъра, почтальонарира чипхьан шлу зегьмет зигура. Вушра, туврайи маважибариз дилигди, узуз фу кахъа, узу фтин эйси вухъа дарпиди, вахтниинди ляхниз гъюри, илтIикIу касдин мурад-метлеб, дерди вахтниинди гьял апIури, подписка дапIнайи газат, урчIарихъна душну, вахтниинди туври гъабхьиш, йиз фикриан, подпискара хъана артухъ хьибди.
