Гъийин девриъ хулаъ деъну амиди интернетдин машариан вари дюн`яйин хабрарихъди таниш хьуз шулу. Гьаци, гьаму йигъари Иркутск шагьриъ яшамиш шулайи, йимишар масу тувру тукандиъ лихурайи Шамхал Гёзаловди, намус ва ччвур заан вузуз пну, алдабгъу лик вари аьламдиз мялум гъабхьну.

Дугъаз чан тукандиз гъаншариъ айи банкдин отделениейиан удучIвурайи, хиликк гъюник кабхъру чанта ва пакет ккайи кас гъяркънийи. Чан машиндихьна хъуркьайиз саб бицIи манзил имиди, дугъхьан пакет тадабхънийи. Шамхал тукандиан удучIвайиз, думу кас рякъюъ учIвнийи. Пакетдиъ саб миллион манат пул айи. Шамхал Гёзалов, саб дакьикьайикьан фикир дарапIди, думу касдин кьяляхъ хъахънийи. Гьелбетда, пакетдин эйсийи машин дедребккри хайлин вахт гъабхьнийи, анжагъ Шамхали пакет машиндин улд`ан улупган дебккнийи.

Пакет чахьна гъурубкьиган, дидин эйсийи, Шамхалин адмивализ чухсагъул дупну, дугъаз пул тувуз хъюгънийи. Пул гъададабгъруб аьгъю гъабхьиган, дугъаз 15 агъзур манатдин кьиматнаъ айи коньяк багъиш гъапIнийи.

Шамхализ, чан дустразтIан гъайри, пакетдин эйсийизси, дюшюшдикан саризра ктибтуз ккунди адайи. Амма дустру, яв намуслуваликан вари халкьдиз мялум дубхьну ккунду дупну, инстаграмдин машариъ гъибикIнийи.

Ярар-дустарин арайиъ Шамхализ: «Пул гьаз тувнийва? Дидихъ увуз хал-йишв гьаз гъапIундарва?», кIурудара цIиб гъахьундайи. Варидарин суалариз жаваб вуди, Шамхали гьамци гъапнийи: «Саб гъапиб, узуз гьамциб тербия туву йиз абайизна бабаз ва багахьлуйириз чухсагъул мялум апIураза. Кьюб гъапиб, узу бахтавар кас вуза. Фицики, узуз дахъру хал, адаш кIуру веледар ва улихьна жвуваз айи-адруб, мани-чIуруб хру, жвуван гъадриъ айи уьмрин юлдаш азуз. Мидланра артухъ узуз сарун фукIа лазим дарзуз. Анжагъ  жвуву зигурайи гьялал зегьметниинди гъазанмиш гъапIуб ипIуз сагъ`вал туври. Узуз думу миллионтIан йиз ччвур ва намус жилиин гьякьлуди гъитувал аьхю бахтарикан вузуз. Гъит, сарун мидкан варидиз аьгъю гъабхьнуш, мицисдар дарсар гъюрайи наслариз чешне вуди ихь арайиъ гъузри».