Мялум вуйиганси, гьамусдизкьан кассайин аппаратар (ККТ) адарди лихури гъахьи идарйири ва кIул’инди вуйи дилаварчйири ццийин 1-пи июлихъан мина чарасуз вуди думу аппаратар ишлетмиш дапIну ккунду.
Чарасуз вуди ККТ ишлетмиш дапIну, налог туврайидарик кахьрайидар гьамрар ву:
инсан хътарди кофе вая чай масу тувру, телефонарихъ, Интернетдин аьлакьайихъ пул хъивру аппаратар айи кIул’инди вуйи дилаварчйир;
кьюбпи жюрейик кахьрайидар чпихьна лихуз инсанар гъадагънайи кIул’инди вуйи дилаварчйир ву (машинарин ремонт апIрудар, агьалйир гъахру машинар хъаърудар, деллегчйир гъадагънайидар ва гь.ж.);
шубубпи жюрейик кахьрайидар цIи-цIибди шей’ар масу туврайи дилаварчйир ву.
Мидланра гъайри, гьамусдихъан тина жюрбежюр идарйириъра чарасуз вуди онлайн-кассйир ишлетмиш апIиди ва гьацира рякъюъди транспортдиъди гъягъбан билетар туврайи кIул’инди вуйи дилаварчйирира ККТ ишлетмиш апIуз хъюгъди.
Къайд дапIну ккундуки, 2021-пи йисан 1-пи июлизкьан ККТ ишлетмиш дарапIуз ихтияр тувнайидар — ляхниз гъадагъбан къайдайин йикьрариинди ляхин апIрудар гъадагъну адрудар, жвуву гьясил гъапIу шей’ар масу туврайидар ва гъуллугъар гьуркIру цирклиъ ляхин апIурайи кIул’инди вуйи дилаварчйир ву.
Дагъустандиъ айи налогарин гъуллугънан Управлениейиан тувнайи мялуматариинди, гъийин йигъаз 1,1 миллионтIан артухъ налог туврайи касари 2,8 миллион онлайн-кассйирин регистрация дапIна.
Эгер кассайин аппаратар ишлетмиш апIуз даккни дилаварчйир аш, дицдарин аьхю журум апIуз мумкин ву.
Му месэлайин гьякьнаан дилаварчйирира чпин фикрар ачухъ апIура.
Сар ихь ватанагьли дилаварчийи (дугъаз чан ччвур ачухъ дапIну ккунди адайи) гьамци гъапну: «Йиз фикриан, гьарсаб таза цIийивалиъ ужуб терефра, харжи терефра а. Гьаму кассайин аппаратар ляхник кирчбаан айи уж’вал гьадму вуки, дурари ариш-веришчивалин ляхин ачухъ апIура, ва хил’ан пул туври, шей’ар масу гъада-гъурайивал къанундин сяргьятариз хура; кьюбпи уж’вал ‒ муштарйирин электрондин адресназ шей’ъ масу туврайирихьан вуйи, яна мутму гъадабгъувал, гъуллугъ гьубкIувал ясана ляхин апIувал тасдикь апIурайи кассайиан чек гъюбан мумкинвал шула.
Му терефнаан хъанара хайлин уж’валарикан, рягьятваларикан пуз шулу.
Хъа читинваларикан улхуруш, мисал вуди гъадабгъиш, ярхлаъ ерлешмиш духьнайи гъулариъ лазим вуйи саягъниинди аьлакьа, интернет дилибхри гъабхьиш, думу албагайизра, хъасин гьаддихъантина дурумлу ляхин тямин апIбаъра техникайин читинвалар гизаф алахьуру. Яна, йиз фикриан, мушваъ гьял дапIну ккуни месэлйир хъанара гъузра».
