Улихьна йигъари РД-йин Главайин ва Гьюкуматдин Администрацияйин кIулиъ айирин заместитель Нюсрет Уьмаров Табасаран райондиз гъафну. Думу Табасаран райондин глава Мягьямед Къурбановдихъди ва РД-йин Халкьдин Собраниейин депутат Алавудин Мирзабалаевдихъди гюрюшмиш гъахьну. Гюрюшдиъ Сиртич гъулаъ агьалйири рягьятвал гъадабгъру багъ-сквер тикмиш апIбан ляхнарихъди аьлакьалу месэлйир гьял гъапIну.

«Деврин шагьрин аьгьвалат арайиз хувал» программа уьмриз кечирмиш апIури, Сиртич гъулаъ рягьятвал гъадабгъру багъ ккабалгура.

Муниципалин гьаму программа уьмриз кечирмиш апIбан дахилнаъди цци Табасаран райондин кьюб гъулаъ – Хюрикк ва Сиртич – рягьятвал гъадабгъру багъар тикмиш дапIну ккунду. Тикилишчивалин ляхнар федералин, респуб-ликайин ва муниципалин дакьатарихъ гъахурайидар ву. Нюсрет Уьмаров, Мягьямед Къурбанов, Алавудин Мирзабалаев ва хъана жарадар багъ тикмиш апIурайи йишв’ина гъушнийи. Багъ 1225 квадратдин метр участокдиин ерлемиш хьибди. Тикилишчивалин ляхнар «Юг-Водстрой “Проект”» тешкилатди гъахура.

Проектдин дахилнаъди бетондин плиткйирикан дапIнайи тротуарар тикмиш апIиди, бару хъивди, электричествойин акв зигиди, хъвархъвсар ирчру йишкIар дивди, инсанар деъру йишвар албагиди, бицIидариз тамшйир апIру майдандиин жюрбежюр тяминатар дивди, гьарар, кюкйир кивди.

Гьамусяаьт тикилишчйири багъдиз жара дапIнайи участокдихъ бордюрар хъивра ва плитка ккивуз гьязурлугвалин ляхнар гъахура. Лап багарихьди бицIидариз вуйи майданра гьязур апIувал планламиш дапIна. Нюсрет Уьмаровди гъабхурайи ляхнин ери уьбхювалин ва вахтниинди дапIну ккудубкIувалин чарасузваликан гъапну. Проектдиз асас вуди, му багъ август вазлин 15-пи йигъаз ккудубкIну ккунду.