Учвуз ихь газатдин машариъ ва редакцияйин сайтариъ рябкъюрайиганси, аьхиримжи вахтна жюрбежюр талитариъ табасаран баяри хайлин хьуркьувалар гъадагъура. Узуз гъи ихь сарсана дирбаш спортсмендикан – Закарья Къадировдикан мялумат тувуз ккундузуз.
Закарья Къадиров гьаму улихьна йигъари Азербайжан республикайин меркез Баку шагьриъ спортдин ММА-йин кчIихбарин жюрйириан вуйи UItimax Fight Night пишекарвалин кчIихбарин турнириъ 66 кило гъагъ айи категорияйиъ Ирандиан вуйи спортсмен Мягьяммаддихъди талитназ удучIвну.
Сабпи раунддиъ Мягьям-мадди ихь спортсмендиз кчIихбариъ ихтияр адру прием ишлетмиш гъапIну. Му дюшюшну Закарьяйик ва дугъан терефкрарик бегьем хъял капIнийи. Имбу кьюб раундиъ Закарьяйи, Мягьяммаддиз саб мумкинвалра гъидритди, судйири сабхилди гъалибвал чан хилиз тувруганси, кчIихуб гъубхну.
Закарьяйин му сабпи гъалибвал дар. Пишекарвалин кчIихбар гъахури дугъан 5-пи раж ву. Гьамусяаьт думу августдин аьхирариъ Кабардино-Балкарияйин Нальчик шагьриъ кIули гъягъру вари халкьарин ММА-йин турнирихьна гьязур шула.
Закарья Къадировди учв Дагъустандиз гъафибси, багъри «Табасарандин нурар» газатдин редакцияйиз хялижвди гъюз гаф тувну. Дугъан уьмрихъди, спортдин хъуркьуваларихъди, гележегдин планарихъди гьадмиган багахьди таниш хьидихьа.
