Хив райондин глава Ярмет Ярметов ва дугъан заместитель Мирзабег Багъичев улихьна йигъари ГъуштIилна ва Чювеккна гъушну. Йишвариин дурари, райондин администрацияйин пресс-гъуллугънаан учуз мялумат тувганси, кьюбиб гъуларин мектебар цIийи урхбан йисахьна фици гьязур духьнаш, ахтармиш гъапIну.
ГъуштIларин кьялан мектебдин директор Айдабег Мазовди ва Чювккерин кьялан мектебдин директор Зейдуллагь Маллакъурбановди райондин кIулиъ айирихъди гъабхьи сюгьбатнаъ, цIийи урхбан йисахьна гьязур хьпан бадали, мектебариъ гъахурайи ляхнарикан ктибтнийи. Директорарин гафариинди, гьамусяаьт кьюбиб мектебариъра расвалин ляхнар бегьемди ккудукIна. Расвалин ляхнар, тялукь гъуллугъарин вари тIалабар ва теклифар гьисабназ гъадагъну, кIулиз гъухну. Мектебариъ косметикайин ремонт дапIна: классарин цалар марцц, кьулариз шир гъивну.
Ярмет Ярметовди мектебариъ кIули духнайи ляхнариз ужуб кьимат тувну.
