Сентябрин 23-пи йигъан Казахстандин Нур-Султан кIуру шагьриъ грепплингдиан кIули гъубшу Варидюн’яйин чемпионатдиъ Урусатдин грепплингдин спортдиин машгъул вуйи ужудар спортсменар айи командайин дахилнаъди ихь ватанагьли, Хючна гъул’ан вуйи Багъир Гьясратовра иштирак гъахьну.
Мялум вуйиганси, Багъири сач грепплингдиан ихь республикайиъ кIули гъубшу Европайин чемпионатдиъра чанубсиб гъагъ айи спортсменарин арайиъ 1-пи йишв гъадабгъну. Хъасин бажаранлу спортсмен варидюн’яйин чемпионра гъахьну. Магьа ццира ихь спортсменди, 77 кило гъагъишин айи спортсменарин арайиъ швнуб-саб талитар гъахбалан кьяляхъ, кьюбпи ражарира дюн’яйин чемпионвалин ччвур гъазанмиш гъапIну.
