Мажвгларин гъул Хив райондин аьхю гъуларикан саб ву. Му гъул`ан жюрбежюр терефариан заан аьгъювалар айи варжаринди аьлимар, лайикьлу духтрар, шаирар, мялимар, спортсменар, мяълийир апIру устадар, халачачйир ва жара пишйирин устадар удучIвна, ва йигълан-йигъаз дурарин кьадар артухъра шула.
Гьацдар аьлимарикан сар биологияйин илмарин кандидат, РФ-дин уьмуми образование-йин лайикьлу гъуллугъчи Низами Юзбегов ву.
2015-пи йислан мина гъийин йигъазкьан Низами Залбеговичди Дербент шагьрин «Дюн’яйин культурайин гимназия» МБОУ-йиз регьбервал тувра. Пуз ккундузузки, му гимназия Дербент шагьриъ варитIан аьхю мектебарикан саб ву, фицики душваъ урхурайдарин кьадар 236, хъа ляхин апIурайи мялимарин кьадар – 139 ву. Урхурайи баяр-шубарин 62 десте а.
Низами Залбеговичди, чан абйир-бабар Мажвгул гъул`ан вуйиз кIури, му гъулаз, гъулан мектебдиз, бицIидарин багъдиз ва мистаз чахьан шлу кюмекар апIури шулу.
Нубатнан ражари дугъу гъуландариз шадвалин серенжем тешкил апIуз, культурайин Хулаз лезги ва табасаран халкьдин мяълийирин устадар хъади гъафнийи. Чан улхбаъ дугъу веледар адрудариз – веледар хьувал, айидариз – дурар эвленмиш апIури, багъри гъулаъ, райондиъ ва республикайиъ мициб шадвал ва ислягьвал кам дархьувал ккун гъапIнийи. Шадвалин мярака Дагъустандин сабвалин Йигъаз, 1-пи октябриъ улубкьру яшлуйирин Йигъаз ва 5-пи октябриъ шулайи мялимарин Йигъаз бахш вуди тешкил гъапIувал субут гъапIнийи.
Гъуландарин терефнаанра гьациб иштирак`вал айики, культурайин Хулаъ тIуб гъивуз
саб жизбикьан йишв адайи. Сягьнайилан гъуландариз сагъламвал ва ислягьвал ккун апIури, Низами Залбеговичдиз чухсагъул мялум апIури, мялимар, тербиячйир ва яшлуйир удучIвну гъулхнийи. Дурарикан сифте вуди гаф ва ялхъван гъапIур – Мажвгул гъулаъ варитIан яшлу кас, 96 йисан яшнаъ айи Аьлескер Нурялиев вуйи.
Му йигъан Мажвгул гъулаз райондианра хялар дуфнайи. Дурарин арайиъ райондин культурайин, спортдин, жигьиларин политикайин ва туризмдин отделин начальник Казбек Къазиевра айи.
Гъит, Низами Залбеговичди гъапиганси, багъри гъулаъ, райондиъ ва гьацира республикайиъ гьамдар шадвалин мяракйир, халкьдин арайиъ ислягьвал ади, кIул`ин аку, марцци зав алди, ихь арайиан гьич кам даришри!
