«Урусатдин почта» ФГУП-дин ляхниъ 2019-пи йисан сабпи октябрихъан мина аьхю дигишвалар гъахьну. Почта акционерарин обществойиз илтIибкIну. ЦIийи къанундиинди аьхюнуб пай акцйирин эйси Урусатдин Федерация гьисаб шула. Гьамус «Урусатдин почтайи» чан ляхин агьалйирин гъуллугъар шлубкьан ухди гьуркIруганси албагуз кка.
Дюзди кIуруш, аьхиримжи йисари почтайин бязи отделенйирин вакиларикан гьеле-меле ужуб гаф ебхьури имдар. Вушра, почтайин идарйириъ лихурайидарин арайиъ намуслуди ляхин апIурайидарра цIиб адар. Гьадрарикан сар 1999-пи йисхъан мина Дербент почтамтдин Хючна гъулаъ айи ОПС-дин операторди лихурайи Мадина Мазалаева ву.
Мадина Шамиловна, 2001-пи йисан ДГУ-йин дагъустан чIаларин факультет ккудубкIну, гьамусяаьт Хючна гъулаъ 1-пи нумрайин кьялан мектебдиъ табасаран чIалнан ва литературайин дарсар кивру мялимдира лихура. Дидланра савайи, дугъаз экономикайин образованиера а – 2005-пи йисан дугъу Дагъустандин гьюкуматдин халкьдин мяишатдин институтдиъ «Финансар ва кредит» факультет ккудубкIну
.
Табасаран райондиъ айи ич мухбир Ражаб Нуровди Мадина Мазалаевайихъди гъубху бицIи сюгьбат исихъ туврача.
– Мадина Шамиловна, гьамус «Урусатдин почта» цIийи жюрейиинди либхуз хъюгъиган, агьалйирин гъуллугъар вахтниинди гьуркIбан бадали, фици ляхин албагуз ккачва?
– Ич идарайин варитIан учIру месэла – гъулариъ айи агьалйирихьна вахтниинди почта дурубкьрайивал – гьял апIбан бадали, гьамусдихъантина Дербент шагьриан Табасаран райондиз гъюрайи почта, Хючна почтайизди дархиди, гъулариъ айи почтайин 14 отделенйиризди хътауз хъюгъди. Жиниб дар, агьалйирин терефнаан, почтальонари газатар лазим вуйи адресназ рукьурадар кIури, учухьна аьрзйир гъюри шулу. Хъа почталь-онари тахсир чпин маважиб цIиб вуйивалик кипру. Гьамус, почтальонарин маважиб за апIбалан кьяляхъ, дурари агьалйирихьна кагъзар ва газатар вахтниинди рукьур кIури, умуд киврача.
Агьалйирин игьтияжар заан ерийиъди гьуркIбан бадали, акционерарин цIийи обществойи хайлин жара ря-къярра ачмиш апIура. Хючна ОПС-диъ «Почта банк» либхуз хъюгъна. Мушваъ агьалйирихьан сберегательный счет ачмиш апIуз, дидихъ пул хъивуз, пулар хътауз, кредитдиз заявка тувуз ва жара гъуллугъар гьуркIуз шулу.
Аьхиримжи вахтна жара гьюкуматариз ва ихь уьлкейин жюрбежюр регионариз хътаъру мутмйирин кьадарра артухъ гъабхьну. Агьалйирихьан «Урусатдин почтайин» отделенйириан уьлкейин вари пIипIариз посылкйир ва кагъзар хътауз, телефондиан (Сбербанк онлайн приложениейин кюмекниинди) посылкайихъан кьимат тувну, думу дишлади почта-йиан гъадабгъуз шулу.
– Райондиъ газатар-журналариз подписка апIбан аьгьвалат фициб ву?
– Магьа 2019-пи йисан 1-пи октябрихъан мина 2020-пи йисандин сабпи гьацIаз подпискара ккебгъна. Газатариз ва журналариз подписка «Урусатдин почтайин» каталогдикан апIуз шулу.
Газатар ва журналар урхбахъ халкьдин гизаф юкIв хъими. Аьхю аьшкьниинди агьалйири «Табасарандин нурар», «Табасарандин сес», «Ппази», «Дагъустан дишагьли» урухуру.
Гьар йисан табасаран чIалниинди чапдиан адагъурайи газатариз ва журналариз подписка апIбаъ аьхю кюмек туврайи Табасаран райондин ЦРБ-йин кIулин духтир Авсеретдин Мирзабеговдиз ва дугъан насигьятчи, Урусатдин лайикьлу духтир Мирзамягьямед Мягьяме-довдиз аферин мялум апIуз ккундузуз.
Хючна ОПС-диъ лихурайи гъуллугъчйирикан улхруган, душваъ операторди лихурайи Сураят Исмаиловнайин терефназра тярифнан гафар дупну ккунду. Му касди почтайин гъурулушдиъ хайлин йисари намуслу зегьмет зигура. Хючна ОПС-дин цIийи начальникди Мисрихан Мисрихановра тяйин дапIну, сад йис шула. Му албагу коллективдиз чпи апIурайи ляхниъ аьхю хъуркьувалар ишри. Дурарин ва гъулариъ айи почтальонарин ляхниз райондин агьалйири гьамусдихъан тина анжагъ ужуб кьиматтIан тутрувур кIури, умуд кивдихьа.
