Гьаму йигъари Хив райондин культурайин Хулаъ Эльмира Аьшурбеговайин 50 йисаз ва яратмиш`валин рякъюз бахш дапIнайи шадлугънан мярака кIули гъубшнийи. Му серенжемдиъ бабан чIалнан дарсар кивру мялимари, райондин администрацияйиан дуфнайи хялари, мектебариъ урхурайи баяр-шубари, шаирари ва мяълийирин устадари, табасаран театрин актерари иштагьниинди иштирак’вал гъапIнийи.
Мярака абццри, сифтейин гаф шаир Аьбдурягьим Аьбдурягьмановди гъапнийи. Дугъу ва серенжемдиъ удучIвну гъулху жара касари чпин улхбариъ табасаран ва дагъустан халкьарин литературайихъ, театрихъ, культурайихъ Эльмира Аьшурялиевнайи зигурайи баркаллу зегьмет субут ва тасдикь гъапIнийи. Хив райондин главайин заместитель Мирзабег Багъичевди, агъуларин шаир Гюльпери Шябановайи, дилаварчи Айваз Рамазановди, табасаран драмтеатрин директор Аьлимурад Аьлимурадовди, азербайжан халкьдин шаир Зeйнаб Дербендлийи, шаир ва мялим Керим Маллаевди, шаир ва мялим Кюребег Мурсаловди, Эльмира Аьшурбеговайин мялим Муса Мусаевди, шаир Рягьимат ТIаибовайи, юбилярин эсерарин таржумачи, Москва шагьриан дуфнайи Роза Агуевайи, Дагъустандин «Ватан уьбхювал» жямяаьтлугъ объединенйирин Союздин ва «Жямяаьтлугъдин фикир» региондин фонднан жямяаьтлугъ комиссияйин председатель Гьясангьюсейн Аьбдулжалиловди, ДГПУ-йин мялим ва аьлим Аьшуряли Адиловди, Хив райондин спортдин, культурайин, жигьиларин политикайин ва туризмдин отделин начальник Казбек Къазиевди, «Табасарандин нурар» газатдин мухбир Мейлан Нежефовди, табасаран театрин актер Аким Сяидялиевди юбилярин терефназ хайлин лайикьлу ва мани гафар гъапнийи.
Шадлугънан серенжемдиъ Дагъустан халкьдин ва культурайин лайикьлу устадар вуйи Аьбдуллагь Мирзакеримовди, Хайир Шаховди, Марьям Къазиевайи, Гюлназ ва Мурад Гьяжикъурбановари, Нурудин Аьбдуллаевди, Гъисханум Авчиевайи, Гъайинбег Къулиевди ва табасаран халкьдин драмтеатрин актерари жанлу иштирак’вал гъапIнийи.
КIваин апIурза, ктабхъурайи йис вари Урусатдиъ театрин Йисси къайд дапIна. Хъа серенжемдиъ Аьлимурад Аьлимурадовди гъапиганси, му йис табасаран халкьди Эльмира Аьшурбеговайин йисси къайд гъапIишра, гъалатI шулдархьу. Фицики, шаирин «Эвелин дих» – Кьалухъ Мирзайикан ва «Хабар тув ихь дустариз» – Багьаудин Митаровдикан вуйи эсерари табасаран театриина ранг ва кьимат гъабхну. Гьаму йигъари Новосибирск шагьриъ кIули гъубшу милли литературйирин фестивалиъра ихь шаири табасаран халкьдин ирс ва чан яратмиш`валин рякъ лайикьлуди улупнийи.
Хив райондин администрацияйин терефнаан Мирзабег Багъичевди шаириз гьюрматнан кагъаз, кюкйир ва пешкешар тувнийи. Гизаф миллетар айи Дагъустандин халкьдин улихь улупу хусуси гьунарариз лигну, Гьясангьюсейн Аьбдулжалиловди Эльмира Аьшурбегова жямяаьтлугъдин арайиъ гьюрмат гъазанмиш апIбаз заан пешкеш – «Дагъустандин намус ва дамагъ – гъизилин люкь» орден тувбиинди лишанлу гъапIнийи.
Гъит, ихь шаирин рякъ хъана ягъурлуб ва акуб ибшри!
