Февралин 21-пи йигъан Дагъустандин образованиейин артмиш’валин институтдин бинайиинди Вари халкьарин бабан чIаларин йигъаз бахш дапIнайи «Милли чIалниинди варитIан ужуди шиир урхрур» конкурс кIули гъубшну.

 

Думу институтдин пресс-гъуллугънаан мялум гъапIганси, конкурс 8 милли чIалнаан кIули гъабхну. Дурарин гьисабнаъ табасаран чIалра а.Табасаран чIалнаан республикайин конкурсдиъ иштирак шулайи 7 кас Табасаран, Хив, Дербент, Гъяякент районарин, Каспийск, Дербент ваДагъустандин Огни шагьрарин муниципалин дережайин конкурсариъ гъалиб гъахьидар ву. Дурарин шиир урхбан бажаранвализ филологияйин илмаринкандидатар Низами Сафарялиевди, Жяфар Агъабеговди, аьлим Мягяьмедрасул Расуловди кьиматар дивну.

Конкурсдин натижйирикан мялумат туври, Низами Сафарялиевди къайд гъапIганси, иштирак гъахьидар йирхьур кастIан дар. Дербент райондиан фужкIа иштирак хьуз гъафундар.

Иштиракчйирин арайиан сабпи йишв Табасаран райондин Жулжагъ гъулан мектебдин 11-пи классдин ученица Аминат Муртузялиевайи гъадабгъну, кьюбпи йишв — Хив райондин Гъвандкарини мектебдин 11-пи классдин ученица Сабрина Аьбдуллаевайи ва шубубпи йишв — Гъяякент райондин Дружба гъулан мектебдин 11-пи классдин ученица Диана Ахмедовайи. Хъа имбуну иштиракчйир иштираквалин сертификатарихъди лишанлу гъапIну.