Гюльнара Мягьямедова
Августдин 21-пи йигъан Урусатдиъ Офицерарин йигъ къайд апIуру. Думу йигъан уьлкейин кьуватнан вари гъурулушарин кIулиъ айидари тебрикнан ва Ватандиз вафалувал улупбаз чухсагъул мялум апIбан гафар кьабул апIуру.
Офицерар – гьюкуматдин маракьар ва дидин ватандашар уьрхбаз уьмур бахш дапIнайи касар ву. Офицервалин ччвурну марцци намус ва жавабдарвал тIалаб апIура.
Гьар йисан агъзрариинди жигьил баяр урхбан идарйирик кучIври, дурхну ккудубкIбан кьяляхъ офицерарин жергйириз гъуллугъ гъабхуз гъягъюри шулу. Дурарин метлеб – Ватан уьбхювалси, пишекарвалин дережа за апIувал, чпиз айи аьгъювалар артухъ апIувал, жямяаьтлугъдин яшайиш заан дережайиз хувал ву.
Улихьнаси республикайин СМИ-йин вакиларихъди вуйи пресс-конференцияйиъ Дагъустандин военный комиссар Дайтбег Мустафаевди дявдин училищйирик, академйирик урхуз кучIвуз ккуни жигьиларин кьадар ис шули адруваликан гъапнийи. Гъи СВО гъябгъюрашра, дагъустандин жигьилари дявдин пишейихьна вуйи аьшкь зяиф гъабхьундар.
Хъа уьлкейиъ думу улупбарикан улхуруш, улихьна йисаритIан 2023-пи йисан офицерар гьязур апIру урхбан идарйири артухъ жигьил офицерар деетну. Диди жигьиларин арайиъ дявдин гъуллугънахьна вуйи маракьлувал артухъ шулайивал, уьлкейин хатIасузвал тямин апIру кадрйир лазим вуйивал субут апIура.
Урусатдин гележег жигьил офицерарикан, дурари хъуркьувалиинди чпин гъуллугъ тамам апIбакан асиллу ву. Гьаму йисан Урусатдиъ 100 агъзуртIан зиина жигьил офицерари вузар ва ссузар ккудукIну. Гьадму гьисабнаан, Москвайин дявдин командный заан училищейи 250 офицер, Санкт-Петербургдин дявдинна гьюлин заан училищейи 150 офицер, Стратегияйин метлебнан ракетйирин кьушмарин дявдин академияйи 100 офицер, Ю.А.Гагариндин ччвурнахъ хъайи дявдинна гьавайин академияйи 180 офицер, Краснодарин дявдинна авиацияйин летчикарин заан училищейи 120 офицер гьязур дапIну деетну. Гьаму сиягьнаъ офицерар гьязур апIру урхбан идарйирин гьацIарра адар. Жигьил офицерарин арайиъ Дагъустандин, Табасарандин вакиларира лайикьлу йишв дибисна.
Училищйириъ урхурайи баярин кьадар артухъ шулайивали ва дурарин гьязурлугвали Урусатдиз деврин тIалабариз гъилигу ва кьудратлу армия уьбхюз ккуниваликан ачухъди мялум апIура.
Гьюрматлу офицерар! Гъийин девриъ учвуз гъагъиди алабхъна. Амма учуз айи мялуматариинди, Урусатдин офицерари чпин намус лайикьлуди уьбхюра. «Табасарандин нурар» газатдин редакцияйин коллективди, ихь генераларилан гъадабгъну варитIан жигьил офицераризра кади, машкврин йигъ тебрик апIурача. Учвуз Урусатди дих дапIна. Ичв ччвур намуслуди уьбхяй. Гъит, хусуси метлеб айи дявдин операция ухди ккудубкIну, учву ичв хизанарихьна сагъ-саламатди гъюричва, учву кадабгънайи пишейи хъуркьувалар хуричвуз.
