Гюльнара Мягьямедова

2020-пи йисан 18-пи мартдиъ Ватандин Аьхю дявдиъ гъалибвал гъадабгъну 75 йис тамам хьпаз бахш вуди, вари халкьарин «Гьюрматнан багъ» акцияйин дахилнаъди гьарар кивуз хъюгънийи. Акцияйин тереф уьлкейин 85 региондиан 300 агъзуртIан артухъ ватандашари ва 50-риинакьан уьлкйири гъибиснийи.

30-пи июндиъ Урусатдин Президент Владимир Путинди, Ржев шагьриъ Советарин эскриз мемориал ачмиш апIруган, дидин багахь наратдин гьар кивну, акцияйин тереф гъюбхнийи. «Ихь гирами буржи – гьарсар кьягьялин гьюрмат уьбхюб ву. Дурарин игитваликан гележегдин наслариз тарих гъитувал – ихь намуснан ляхин ву», – гъапнийи уьлкейин кIулиъ айири.
«Ватандин маракьар уьрхюри СВО-йиъ гъийиху кьягьяларин гьюрматназ багъ кивувал – думу варидариз ужуб ва нумуна ляхин ву. Гьаддиз Дагъустандин шагьрарин ва районарин кIулиъ айидариз вари муниципалитетариъ «Гьюрматнан багъар» кивувалин теклиф дивунза. Гьарар кивбалан савайи, СВО-йиъ веледар гъийиху инсанар сатIи шули, чпин кIван дерди гьял апIуз шлу чардхьиккишвар тикмиш гъапIишра, ядигарар дивишра ужуди хьибди. Сентябрин ваз кубкIайиз гьарсаб муниципалитетди чан проект гьязур дапIну ккунду. Хъа чвлин вахтнаъ гьарар кивуз хъюгъдихьа», – гъапну Сергей Меликовди.
15-пи августдиъ Табасаран райондин администрацияйиъ кIули гъубшу аппаратдин совещаниейиъ муниципалитетдин кIулиъ айи Мягьямед Къурбановди, республикайин вари шагьрариъ ва районариъ СВО-йин игитариз «Гьюрматнан багъар» кивбан республикайин Глава Сергей Меликовдин теклифнакан кIваин гъапIнийи.
Совещаниейиъ думу месэла хъайи-хъайиси гьял апIбан кьяляхъ, «Гьюрматнан багъ» Ургур чвуччвун ва сар чуччун гъалайиин кивуз къарар адабгънийи. Гележегдиъ гьадму багъдиъ СВО-йиъ гъийиху кьягьялариз ядигарра дивуз мумкинвал хьибди.
Хъа «Гьюрматнан багъ» фициб дубхьну ккундуш, дизайн-проектдин конкурс мялум апIуз йикьрар гъапIну. Конкурсдиъ варитIан ужуб проект гъядябгъиди.