Гюльнара Мягьямедова
«Газпром межрегионгаз Махачкала» ООО-йи газ ишлетмиш апIру гьарсар касди дюрхну ккуни хатIасузвалин къайдйир кIваина хура. Дурарихъди учвура таниш апIурача.
Сабпиб ва варитIан асасуб: эгер хулаъ газдин ниъ абхънаш, дишлади пишекрарихьна илтIикIай. Мобильный телефондиан 104 нумрайиз, ясана кюмек тувру гъуллугънан 112 нумрайиз дих апIинай.
Учв яшамиш шулайи хуларихъан гьарсар кас жавабдар ву. Хулаъ айи газдин авадлу-гъарин агьвалатнахъанра эйсийи жавабдарвал гъабхуру.
Хулаъ яшамиш шулайидари газдин плитйир, шид мани апIрудар, хулар аргру пичар марцциди дюрхну ккунду. Пичраъ газ кабхьайиз, кумран зигувал ахтармиш апIуб лазим ву, эгер зигувал адарш, пич кабхьуз хай шулдар.
Биржру шлангдин гьялназ асас фикир тувувал лазим ву: эгер думу илтIибкIнаш, зибгури дебккнаш, электричествойин тяминатарик кубкIраш, дюз апIинай. Биржру шланг сертификат алиб вуди ккунду.
БицIидар кабхьнайи газдин пичран багахьна гъюз мигъитанай, дурар газдин бакришнарихъди тамшир апIуз хай даршлувалин гъаврикк ккаай.
Эгер хулаз манишин тувру пичру кьюрдун аьхъю вахтнаъ ляхин апIурадарш, хураг гьязур апIбан бадали вуйи пич манишин бадали макабхьанай. Думу пич ипIруб гьязур апIругантIан ишлетмиш апIуз хай шулдар.
Газдин тяминатар айи йишв планламиш апIбаз асас фикир лазим ву: квартирйириъ – кухняйиз ва ваннайин хулаз. Хуларин эйсйири расвалин ляхнар апIруган, газдин турбйир кми-кмиди шкафариъ жин апIури шулу, ванна айи хулаъ гьава убчIвру йишв ккебкру. Дицисдар ляхнари газ гъябгъюрайи йишв ашкар апIуз манигъвал апIуру ва газ хулаъ уч хьуз гъитру. Яшамиш шлу хуларин кодексдин къайдйириинди дицисдар ляхнар апIуз хай шулдар, амма ихь яшайишдиъ дицисдар дюшюшар гизаф шулу.
Хулаъ газдин ниъ аш гьапIну ккунду?
Газдихъди вуйи ляхин къайдайиан удубчIвнайивалин сабпи лишан – хулаъ газдин ниъ абхъувал ву. Дишлади хул’ан удучIвну, телефондин 104 ясана 112 нумрайиз зенг апIинай. Газдин ниъ айи хулаъ дийигъну, телефондиан зенг апIувал хатIа ву. Хул’ан удучIвайиз, хулан унчIвар тIаай, мумкинвал аш, газ гъюрайи кран хъябкьяй. Электричествойиинди лихру алатар кархьуз, ктIуршвуз хай шулдар. Эгер ачухъди убгурайи цIа кайи йишв аш, кутIубшвай. Эгер газ удубчIвнайиваликан гъуншйириз мялумат тувуз ккундуш, дурарин раккнарик кучай, амма душвак кайи зенгназ миилзиганай. Электричествойиинди вуйи зенгнан цIюмгъял цIа кабхъувалин ва тIубкIувалин себеб хьуз мумкин ву.
Газдин гъуллугънан пишекрарин десте гъафиган, дурари сабпи нубатнаъди газ хъябкьди, чIур дубхьнайи йишв дабгну, рас апIуз хъюгъди.
