Декабрин 4-пи йигъан «Саб вуйи Урусат» политикайин партияйин Д.А.Медведевдин РД-йиъ айи региондин жямяаьтлугъ вакилар кьабул апIру йишваъ Дагъустандин Глава Владимир Васильевди чав ватандашар кьабул гъапIну.
Республикайин кIулиъ айир жямяаьтлугъ маракьарихъди аьлакьалу швнуб-саб аьрзайихъ хъпехъну. Дугъахьна илтIикIу касарикан сар Табасаран райондин Жвулли гъулан агьалйирин терефнаан тIалаб хьади дуфнайи Мирза Мирзаев вуйи. Гъийин йигъаз Жвулли гъулан агьалйириз ФАП адрувалин месэла лап учIруди дийибгъна. Жвулли гъулаъ фельдшервалинна акушервалин пункт лицензияйин тIалабариз жаваб тутруврайи гъулан клубдин хулаъ ерлешмиш дубхьна. Владимир Васильевди му цирклин министерствойиз, айи вари мумкинвалар ишлетмиш дапIну, гъулан агьалйирин фикирра гьисабназ гъадабгъну, му месэла гьял апIбан табшуругъ тувнийи.
