Улихьна йигъари Дагъустан Республикайин Глава Владимир Васильевди, ноябрин аьхиримжи элгьет йигъан ихь уьлкейиъ къайд гъапIу дадайин Йигъахъди аьлакьалу вуди, республикайин дишагьлийир гьюкуматдин пешкешариинди лишанлу гъапIну.
Му йигъан асас вуди уч духьнайидар гизаф бицIидар айи дадйир, жюрбежюр карханйирин гъуллугъчйир ва хулан ляхинра, пишекарвалин ляхинра заан дережа-йиъди апIуз удукьурайи дишагьлийир вуйи. Гьадрарин арайиъ Табасаран райондин Кюрягъ гъул’ан вуйи Саният Шябановара айи.
Чан улхбаъ республикайин Главайи гьамци гъапнийи:
«Гъи узуз учвухъди гюрюшмиш хьуз мумкинвал тувувализ чухсагъул кIураза. Пуз ккундузузки, хизандиъ, жямяаьтлугъдин арайиъ учву гъабхурайи ляхин, уйнамиш апIурайи роль аьхюб ву. Гьаддиз узуз учвуз аьхю вуйи чухсагъул пуз ва учвухьна вуйи йиз гьюрмат улупуз ккундузуз».
Улхуб давам апIури, Владимир Васильевди къайд гъапIганси, гъийин йигъан ихь республикайиъ ва республикайин агьалйирин арайиъ айи варитIан ужуб – му дадйирин ляхнин натижа ву.
Главайин улхуб ккудубкIбан кьяляхъ, уч духьнайи дишагьлийириз пешкешар тувуз хъюгънийи. Му йигъан республикайин Главайин хилариан, 7 байна 5 риш уьрхбаз ва хизандинна веледариз тербия тувбан аьдатар мюгькам апIбаз лигну, Мягьячгъалайиан вуйи Гьялимат Гьюсейновайиз Дадайин орден тувнийи.
Хъасин уч духьнайи дишагьлийир ккудубшу дадайин Йигъахъди Дагъустандин дишагьлийирин Союздин председатель Интизар Мамутаевайира тебрик гъапIнийи.
Серенжем давам апIури, Интизар Мамутаевайи ихь ватанагьли, хайлин йисари халачичивалин ляхин давам апIурайи, гизаф уткан халачйир урхурайи Саният Шябанова гьюкуматдин пешкеш тувбиинди лишанлу гъапIнийи.
Серенжем ккудубкIбан кьяляхъ, учу Саният Шябановайихъди сюгьбат гъапIунча. Дугъу мялум гъапIганси, халачичивалин ляхин давам апIури, дугъан 25 йис ву. Гьадму гьисабнаан 10 йисандин арайиъ дугъу фабрикайиъра ляхин апIури гъахьну.
«Узуз сабпи нубатнаъди Табасаран райондин дишагьлийирин Советдин кIулиъ айи Айханум Рашидовайиз, гьюкуматдин пешкеш тувбан бадали узу улупбаз, чухсагъул мялум апIуз ккундузуз. Гьамкьан йисари халачийихъ зегьмет зигури, гьелелиг узуз мици чухсагъул гъапир адайи. Мид’инди узу дамагъ апIураза. Мицисдар серенжемар гъахбаз, дишагьлийири апIурайи ляхниз кьимат тувбаз республикайин Глава Владимир Аьбдуаьлиевичдиз ва гьацира Интизар Мамутаевайизра чухсагъул пуз ккундузуз. Гъит, гьамцдар серенжемар хъанара артухъ ишри», – гъапнийи Саният Шябановайи.
