Гъябгъюрайи гьяфтайиъ Хив райондин культурайин хулаъ туриствалин форум кIули гъубшнийи.
Форум абццри, cифтейин гаф Хив райондин админист-рацияйин культурайин, спортдин, жигьиларин политикайин ва туризмдин отделин начальник Казбек Къазиевди гъапнийи. Чан удучIвну улхбаъ Казбек Зейнудиновичди сифте серенжемдин вари иштиракчйир ва райондин администрацияйин вакилар улубкьурайи 2020-пи йисахъди тебрик гъапIнийи. Хъасин кьатI’иди Хив райондиъ дуланмиш шулайи кьюб миллетдикан, дурарин сар-сарихьна айи хатур-гьюрматнакан, халкьдин культурайикан, дуланажагъдикан, гъирагъдилан гъафи хялижв касдихьна айи гьякь-гьюрматнакан, думу кьабул апIбан аьдалатнакан, табиаьтдин уткан йишварикан, гъаргъу булагъарикан, бегьерлу багълар-бахчйирикан, урсру штарикан, Кьаркьул дагъдин акуваликан, музеярикан, тюрк, аьраб чIалариинди дикIбар кайи хуларин цаларикан, накьвдин гъванарикан ва гьацдар жара тарихи йишварикан ктибтнийи.
Райондин глава Ярмет Ярметовдира чан улхбаъ аьсрариинди чвйирси яшамиш шулайи табасаран ва лезги халкьарин арайиъ айи сигъ аьлакьйирикан гъапнийи. Гьам аьрабарихъди, тюркарихъди, гъизилбашарихъ, татарарна манголарихъси чапхунчи дявйир кьюбиб халкьарира фици намуслувалиинди, баркаллувалиинди аьх гъапIнуш, фици уьл гъипIнуш, ипIураш ва ипIуруш чан улхбаъ мялум гъапIнийи. «Гьарсаб гъулаъ яшамиш шулайи касдиз чан гъулкан, табиаьтдикан, хизан-кюлфетдикан аьгъюди хьуб инсандин заанвал ву. Аьгъю апIузра гьарсар кас буржлу вухьа», – къайд гъапIнийи райондин главайи.
«Даг-Бары-Тур» ООО-йин директор Гьяжимурад Аьлиевди чав гъабхурайи ляхникан, ляхниъ чав фициб иштагьвал ади архьнаш серенжемдин иштиракчйириз ва райондин администрацияйин гъуллугъчйириз ктибтнийи.
Аьхириъ гъулариан дуфнайи иштиракчйири, чпи «Хив райондиъ варитIан уткан, такабур тарихи йишв» конкурсдиз гьязур дапIнайи видеороликарикан, шикларикан, альбомарикан ктибтури, презентация кIули гъубхнийи. Дурарин арайиъ гъалиб гъахьи касар дипломариинди, пешкешариинди ва пулин дакьатариинди лишанлу гъапIнийи.
КIваин апIуз ккундузузки, му конкурс гъябгъюрайи йисан октябрин 25-дилан декабрин 20-дизкьан давам гъабхьнийи. Конкурсдин асас метлеб – Хив райондиъ туризм артмиш апIувал, туриствалин маршрут хъипувал, хялар кьабул апIру хулар-йишвар тикмиш апIувал, гъуларин тарихнакан ктибтру касар гьязур апIувал ва райондин агьалйир цIийи лихру йи-шварихъди тямин апIувал вуйи.
Гъит, 2020-пи йисан му ужудар ниятар кIулиз удучIври, хъа райондиз гъюру туристариз кIваълан дурушру, ужудар гьиссар гъузри!
