ЦIийи йис улубкьайиз улихьна Дагъустан Республикайин Глава Владимир Васильевди шадлу мажлиснаъ РД-йин Главайин грантариз вуйи конкурсдин гъалибчйир мялум гъапIну, ва образованиейин, илимдин, техникайин, экономикайинна идара апIбан, культурайинна искусствойин, жигьиларин политикайин, физический культурайинна спортдин, жямяаьтлугъ ляхнин, СМИ-йин, бицIи дилаварчивалин цирк-ларин ужударсдар вакилариз сертификатар тувну.

 

Думу касарин цIийи проектариъ атIаргнайи теклифар Дагъустандин артмиш’вализ варитIан ужудар ва маракьлудар вуди гьисаб гъапIну.

Владимир Васильевди мяракайин эвелиъ къайд гъапIганси, гьамусяаьт айи грантарин политика пишекарвалин ляхнихьна, урхбахьна, экономикайин ва жямяаьтлугъдинна политикайин месэлйирихьна цIийи жюрейин теклифарин бинайиинди дюзмиш апIура. «Гъи мина гьадму ляхин ужуди апIуз удукьру касар уч духьна», – къайд гъапIну региондин Главайи.

Гьаму йисан конкурсдиз 325 проект улупнайи, яна 1 грантдин йишв’ин 6 проект. Дагъустан Республикайин Главайин грантариз лигру Советди ужударсдар 51 проект гъядягънийи, думу проектариз 13 650 агъзур манатдин кюмек тувди.

Дагъустандин гьюкуматдин технический университетдин терефнаан Дагъустан Республикайин Главайин грантариз вуйи конкурсдин лауреатарин арайиъ «БицIи дилаварчивал, сирникк ккайи экономика ва налогар илирчбаан муниципалитетариз айи мумкинвал» проект хьади, ихь ватанагьли, экономикайин илмарин кандидат Везирхан Гираевра а.

Му проект гележегдиъ сабпи нубатнаъди гьял дапIну ккуни экономикайин артмиш’валин месэлйириз ва Дагъустандин налогарин цирклин мумкинвалариз бахш дапIнайиб ву.

Главайи Везирхан Камалиевичдин проектдиз заан кьимат дивнийи ва варитIан артухъ вахтна дидин гьякьнаан гъулхнийи. «Эгер саб муниципалитетдиъ гьаму проектди хъуркьувалар улупиш, думу проект жара муниципалитетариъра уьмриз кечирмиш апIбиин зегьмет зигидихьа», – гъапну Владимир Васильевди.

«Табасарандин нурар» газатдин коллективди Везирхан Гираев чан проект гъалиб хьувалихъди тебрик апIури, дугъаз ляхниъ заан хъуркьувалар, мюгькам сагъ’вал ккун апIура.