Улихьна йигъари Москва шагьриъ образованиейин цирклин проектариз кюмек апIру Фонднан тешкиллувалиинди вари Урусатдин жигьиларин проектарин «Урусат – 2035» конкурсдин очно вуйи этап кIули гъубшну. Дидиъ Мягьячгъалайиъ айи гизаф цирклариан аьгъювалар тувру республикайин зигьимлу бицIидариз вуйи лицейин 8-пи классдиъ урхурайи ихь ватанагьли Сулейман Аскеров Гран-прийин лауреат гъахьну.
Къайд дапIну ккундуки, РФ-дин 2035-пи йисазкьан вуйи яшайишдинна экономикайин артмиш’валин стратегйирин проектариз бахш дапIнайи му конкурс РФ-дин Федерацияйин Советдин кюмекниинди кIули гъубшнийи. Конкурсдин заочный этапдиъ конкурсдин комиссия Урусатдин вари регионариан дуфнайи 7000-тIан артухъ аьрзйириз гъилигну. Дикъатлуди дурар ахтармиш апIбан кьяляхъ, конкурсдин очный этапдиз 7 йислан 35 йис’ина яшар айи 1000-рихьнакьан иштиракчйириз дих гъапIну.
Сулейман Аскеров му конкурсдиъ 11 йислан 14 йис’ина яшар айи живанарин арайиъ «Эссе» номинацияйиъ иштирак гъахьну. Думу ДГУ-йин политэкономикайин кафедрайин заведующийди лихурайи ихь ватанагьли, профессор Низами Аскеровдин бай ву.
«Му конкурсдиъ узу йиз мялим Руслан Билаловдин хиликкди гьязур дапIнайи «Халкьдин ариш-веришчивал 2035-пи йисазкьан вуйи Стратегияйиъ» кIуру проектдин ляхин хьади иштирак гъахьунза. Къайд дапIнайи йиз ляхниъ узхьан Дагъустан Республикайин чпиз барабар вуйиб адру халкьдин художествойин сяняаьткарвалариз айи саб жерге конкурентвалин кьатI’и мумкинвалар, дурари региондин экономикайиъ уйнамиш апIурайи роль, дурарин эгьемиятлувал улупуз гъабхьунзухьан», – ктибтура Сулейман Аскеровди.
Конкурсдин жюрийи ихь ватанагьлийи гьязур дапIнайи проектдин лайикьлувалар къайд гъапIну. Фицики думу, экономикайинна яшайишдин артмиш’валиъси, тажрубайиъра ишлетмиш апIбан мяна айи проект ву. Дидиъ, мисалназ, ихь милли сяняаьткарвал вуйи халачичивалин артмиш’вал гизаф бицIидар айи хизанарин кьадар артухъ апIбахъди аьлакьалу дапIна – миди хизандиъ веледариз зегьметнан тербия тувузра ва аьлава гъазанжар гъадагъузра кюмек тувди.
Гьаддиз жюрийи адабгъу къарарназ асас вуди, Аскеров Сулейман Гран-прийин лауреат гъахьну ва пулиинди пешкешлура гъапIну. Хъа 1-пи йишв Томский областдиан вуйи Михаил Гусаковдиз, 2-пи йишв Алтайский крайин вакил Анна Ивановайиз ва 3-пи йишв Московский областдиъ яшамиш шулайи Дарья Петрушанкойиз тувну.
Пуб лазим вуки, конкурсдиъ иштирак гъахьи вари ужударсдар проектар Урусатдин Федерацияйин экономикайин артмиш’валин Министерствойиз хътаъну, ва 2035-пи йисаз вуйи гьюкуматдин социалинна экономикайин артмиш’валин Стратегия тартиб апIруган, дурар гьисабназ гъадагъиди. Мидланра гъайри, конкурсдин вари гъалибчйир гьюкуматдин органарин, жюрбежюр компанйирин ва корпорацйирин кадрйирин резервдизра гъадагъиди.
«Табасарандин нурар» газатдин коллективди Сулейман Аскеров жигьиларин проектарин «Урусат – 2035» конкурсдин Гран-прийин лауреат хувалихъди тебрик апIури, дугъаз гележегдиъ хъана заан хъуркьувалар ккун апIура.
