Декабрин 20-пи йигъан Мягьячгъалайиъ Дагъустан Республикайин Кадрйирин центриъ «Йиз Дагъустан – Йиз Табасаран» конкурсдин кьюбпи пай, хъа 26-пи декабриъ – шубубпи пай кIули гъушнийи.
Конкурс «Табасаран район» МО-йин глава Мягьямед Къурбановдин тешкиллувалиинди, Дагъустан Республикайин Главайин ва Правительствойин Админист-рацияйин Кадрйирин центрин кюмекниинди, «Табасаран район» муниципалин райондиъ ерли самоуправлениейин органариъ идара апIбан гъуллугъариина ва муниципалин гъуллугъариина кадрйирин резервдиз кандидатар гъядягъбан бадали, гъабхурайиб ву.
Табасаран райондин администрацияйин уьмуми отделин начальник, конкурс кIули гъабхбан жавабдар кас Халетдин Къурбановдин гафариинди, конкурсдин кьюбпи пай шубуб имтигьяндикан ибарат вуйи: тестариз жавабар тувувал, муниципалин гъуллугънан цирклиъ Конституцияйин къанунар аьгъюди хьувал, гьацира гьюкуматдин чIал ва компьютерин технологийир аьгъювал ахтармиш апIувал. Конкурсдин кьюбпи пайнан дахилнаъди гьарсар касдихъди сюгьбат гъабхувалра айи.
Конкурсдиз 100 касди аьрза тувнийи. Думу кьадарнакан 82 кас конкурсдин кьюбпи пайназ деетну. Кадрйирин центриъ идара апIбан гъуллугъариз аьрза туву 31 касди тестариз жавабар тувнийи.
«Конкурс ачухъди гъябгъюра. Учуз тестар гьязур гъапIуб Кадрйирин центр ву. Конкурсдиъ иштирак шулайидариз тестар гъи сабпи ражари дяркъну ами. Дурарикан гьарсарихьан компьютерихъ дусну чан тестарин натижайиз лигуз шулу. Мушваъ саризра я кучIал апIуз, я гьюрмат апIуз шулдар. Вари ляхин гьякьлуди ва дугъриди кIули гъябгъбан бадали, учу конкурсдиъ иштирак шулайидарихъди республикайин Кадрйирин центриз гъафунча. Тестарин натижйириз лигну, администрацияйиъ гьарсарихъди сюгьбат гъабхувал гъябгъиди. Конкурсдин комиссияйин 50 процент асиллу дару экспертар – РД-йин Главайин ва Правительствойин Администрацияйин, РД-йин юстицияйин Министерст-войин, райондин жямяаьтлугъдин, илимдин ва образованиейин тешкилатарин вакилар ву. Комиссияйиъ гьацира райондин глава, кадрйирин отделин начальник, администрацияйин аппаратдин кIулиъ айир ва профсоюздин тешкилатдин председатель а.
Къайд апIувал лазим вуки, конкурсдин комиссия дюз дару кьимат тувуз даршлу жюрейиинди тяйин дапIна», – къайд гъапIнийи Халетдин Къурбановди.
Серенжемдиъ Табасаран райондин глава Мягьямед Къурбанов, РД-йин юстицияйин министр Къазимягьямед Сефикъурбанов, РД-йин Главайин ва Правительствойин Администрацияйин гъуллугъчи Заур Иманалиев, конкурсдин комиссияйин членар ва жямяаьтлугъ сиясатчивал гъабхрудар, журналистар иштирак гъахьнийи.
РД-йин Главайин ва Правительствойин Адми-нистрацияйин Кадрйирин центрин кIулиъ айирин заместитель Салимат Аьлиуьмаровайин гафариинди, «Йиз Дагъустан – Йиз Табасаран» конкурсдин Мягьячгъалайиз дуфнайи иштиракчйирик «Табасаран район» МО-йин главайи аьхю умуд кивра.
«Учу му месэла Мягьямед Къурбановдихъди гьял апIури гъахьунча, дугъан гафариинди, мина дуфнайидариз планламиш апIуз, инсанарик гьевес капIуз, чахъди гъахуз аьгъюди хьувал чарасуз ву. Йирси къайдйирихъди ваъ, цIийи жюрейиинди ляхин апIуз, райондин хъуркьуваларихьна рякъ ккивуз аьгъювал лазим ву», – гъапнийи Салимат Аьлиуьмаровайи.
Декабрин 26-пи йигъан конкурсдин иштиракчйирихъди гьарсарихъди жа-жаради вуйи сюгьбат гъубнийи. Хъа конкурсдин натижйир 27-пи декабриъ мялум апIбанди ву.
