ЦIийи йисаз – цIийи майдан

 

Декабрин 28-пи йигъан Мягьячгъалайиъ расвалин ляхнар гъахбан кьяляхъ, Лениндин чвурнахъ хъайи аьхю майдан ачмиш гъапIну. Шадлугънан серенжемариъ Дагъустан Республикайин Глава Владимир Васильев, РД-йин Халкьдин Собраниейин, Правительствойин вакилар, шагьрарин ва районарин администрацйирин главйир иштирак гъахьнийи.

 

Серенжем, аьдат вуйиганси, уьру бафта гьадабтIбалан ккебгънийи. Дидин кьяляхъ региондин кIулиъ айир республикайин районарин ва шагьрарин главйирихъди ва агьли касарин советарин вакиларихъди сатIиди, Ватандин Аьхю дявдиъ гъалибвал гъадабгъну 75 йис хьпаз тялукь вуди «КIваинди уьрхювалин багъ – уьмрин багъ» лишанлу ччвур тувну, 54 гьар кивнайи йишвлан илтIикIну.

Дагъустандин Глава серенжемдиз уч духьнайи шагьрин агьалйирихьна ва мина дуфнайи хяларихьна илтIикIну. Дугъу республикайин агьал-йир улубкьурайи ЦIийи йисахъди тебрик гъапIнийи ва гьарсар касди чан йишв’ин гъапIу ляхниз чухсагъул гъапнийи.

Мягьячгъала шагьрин кьялан майдан рас апIбакан улхури, Владимир Васильевди Москвайи Мягьячгъалайиъ расвалин ляхнар гъахуз пулин дакьатар тувбакан гъапнийи. «Ихь Президентди ккун гъапIиган, Сергей Собянинди кюмекнан хил гьачIабккну: ихь майдан цIийи алапIуз пулин дакьатар жара гъапIну», дупну, РД-йин Главайи Москвайин мэриз ва правительствойиз чухсагъул мялум гъапIнийи.

ЦIийи алапIнайи майдандиин 14 халачийин накьиш хьиди. Хъа гьеле саб – нугъаярин халачитIан гьязур дубхьнадар.

Владимир Васильевди къайд гъапIганси, майдандиин жигьиларизра, агьли касаризра рягьятди ва гъулайди хьуз вари мумкинвалар ишлетмиш дапIна.

«Президентди ухьуз гьарган кюмек апIура. Гьаму майданра ихь республикайин уьмрин дережа за апIру дакьатарикан саб ву.
Мидланра савайи, гьаму йисан штухъди тямин, рякъяр тикмиш апIбан программа уьмриз кечирмиш апIурахьа, саки вари районариъ рягьятвал гъадабгъру паркар къайдайиз духнахьа», – гъапну республикайин Главайи.

Владимир Васильевди уч духьнайидарин фикир налогар тувбан важиблувалиина жалб гъапIнийи. Дугъан гафариинди, налогар – фунуб региондинра яшайишдинна экономикайин артмиш’валин бина ву.

Региондин Главайи аьхюну пай республикайин бюджетдиан вуйи дакьатарихъ масу гъадагънайи, мектебариз автобусар ва медицинайин тяди кюмекнан машинар улупнийи.
Чан улхбан аьхириъ РД-йин Главайи, ЦIийи йисан машквран йигъари агьалйирин хатIасузвал уьбхюри, медицинайин гъуллугъар тямин апIури, гьацира жара цирклариъ лихурайидариз чухсагъул мялум гъапIнийи.

Дугъан кьяляхъ уч духьнайидарин улихь Мягьячгъала шагьрин мэр Салман Дадаев удучIвну гъулхнийи.

Дугъу РД-йин меркездин агьалйирин ва чан терефнаан тикилишчивалин ляхниин гюзчивал гъубху республикайин Главайиз, тикилишчивалин тешкилатарин пишекрариз, майдан рас апIбан ляхник пай кивдариз варидариз чухсагъул гъапнийи.

Серенжем Дагъустандин артистарин концертдин программа улупбиинди ккудубкIнийи.