Гьюрматлу ватанагьлийир!
Гьаммишан гьяракатнаъ айи тарихнан чархну магьа сабсана йис чахьна кьабул гъапIну, хъа ухьуз пешкеш вуди ЦIийи йис тувну. Кечирмиш гъабхьи йис республикайин «Табасарандин нурар» газатдин редакцияйиз метлеблу гъабхьну. Газатдин машариъ чап апIурайи макьалйирин мяналувал, метлеблувал, маракьлувал ва тясирлувал дерин, хъа дурарин кьадар артухъ, география – яркьу гъабхьну. Мидихъди сабси, газатдин редакцияйиъ лихурайи журналистари ккудубшу йисан ихь аьдати халкьдихъди, жюрбежюр гъуллугъариъ лихурайи ватанагьлийирихъди, Дагъустан Республикайиъси, Урусатдин жюрбежюр регионариъ яшамиш шулайи табасаранлуйирихъди вуйи аьлакьйирра мюгькам гъапIну.
Тарихдиз гъубшу йисан газатдин машариъ ихь уьмрин вари цирклариъ кIули гъягъюрайи важиблу гьядисйирикан ктибтури, газатдин вакилари жвуван ватанагьлийир ихь багъри районариъ, вари Дагъустан Республикайиъ, Урусатдин Федерацияйиъ гъахьи цIийиваларихъди таниш апIури гъахьну. Улубкьу йисан учу му ляхин хъанара мюгькам ва гужал апIидича, ич вари кьувватар, мумкинвалар, яратмиш апIбан ляхин ва фикир багъри халкьдиз уж’вал апIуз, яшайиш жигьатнаан ихь миллетдин уьмур артмиш ва авадан апIуз сарф апIидича.
Аьзиз ватанагьлийир, «Табасарандин нурар» газатдин гьаммишанлугъ юлдшар, дидин подписка гъапIдар, подписка апIуз кюмек тувдар, думу урхурайидар ва газатдин цIийи тарих яратмиш апIбаъ иштирак шулайидар, ва гьацира кIулди вари ихь табасаран улмат, учву вари улубкьу ЦIийи йисахъди марцци кIваан мубарак апIурача! ЦIийи йисан ихь миллетдин гьарсар касдин кIваъ айи ужудар мурадар, метлебар, ниятар, хиялар ва фикрар чаз ккуниганси кIулиз удучIври. Гьарсаб табасаран хизандиъ мясляаьт, берекет, девлет, сагъ-саламатвал, хушбахтвал, шадвал ва мублагъ’вал ишри. Хъа ихь халкьдиз му йис ягъурлуб, цIийивалар, заан хъуркьувалар, артмиш’вал айиб, жямяаьтдин арайиъ гьаммишан ислягьвали, сар-сариз гьюрмат апIували, сабвали, яшайишдин важиблу месэлйир гьялапIуз удукьували, аку, шадвалин гьядисйири агъавал апIруб ибшри!
«Табасарандин нурар» газатдин редакцияйин коллектив
