Зубайдат Шябанова
Улихьна йигъари Дагъустандин глава Сергей Меликовди дагълу гъуларин ва ярхлади ерлешмиш духьнайи йишвариъ яшамиш шулайи инсанарин ихтиярар уьрхбаз бахш дапIнайи Вариурусатдин координационный советдин яркьу совещаниейиъ Табасаран райондиан вуйи эскрар вари халкьдиз нумунади гъахи гафар вари интернетдиъ ва социалин сетариъ тарагъну.
«Дагълу аьтрафарин агьалйир – ихь дамагъ, далу ва даягъ ву. Дурари Кавказдин халкьарин аьдатар, культурайинна тарихдин багьалу ирс мюгькамди уьбхюра. Гъи, ватандин маракьар уьрхюри, хусуси метлеб айи операцияйиъ айидар иллагьки дагълу йишвариан вуйи эскрар ву.
Мисалназ, анжагъ саб Табасаран район гъадабгъиш, гъи дявдин гьяракатар гъягъюрайи йишваъ сабпи жергйириъ 3 агъзурихьна табасаран баяр а. Дурарикан 500 эскер гьюкуматдин жюрбежюр наградйириинди лишанлу дапIна, хъа 4 эскер – Урусат Федерацияйин Игитар гъахьну. Дамагъ апIуз мутIан аьхю себеб шулин?» – гъапнийи республикайин главайи.
Ав, дугъриданра, республикайин кIулиъ айир гьякь ву. Игит халкьдин баярра игитар шулу. Хусуси метлеб айи дявдин операция ккебгъхъан, Урусатдин яракьлу кьувватарин жергйириъ айи эскрарилан гъайри, хайлин табасаран баяр чпин хушниинди ватандин маракьар уьрхюз гъушну. Дурарикан сар Табасаран райондин Ккувагъ гъул’ан вуйи дилаварчи Сабир Мирзаев ву.
Сабир Мирзаев 2000-пи йисхъанмина Белгородский областдиъ яшамиш шула. СВО ккебгъу сабпи йигъарихъанмина дугъу ихь эскрариз рягьимлувалин кюмек туври гъахьну. Улихьнаси думу учвра ихь уьлкейин яракьлу кьувватариъ гъуллугъ апIурайи эскрарин жергйириъ учIвну. Гъуллугънан сабпи дакьикьйириъ думу Украинайиъ гьитIикIуз гьерграйи, «Крокусдиъ» теракт гъапIу тахсиркрар дисбан операцияйиъ иштирак гъахьнийи. Му операция хъуркьувалиинди кIули гъабхбаз думу «Дирбаш’вал улупбаз лигну» медалиинди лишанлу гъапIну.
Сабир ужудар хъуркьувалар айи ариш-веришчи ву. Дугъу чан бизнес жюрбежюр цирклариъ мюгькамди артмиш апIура. Дугъан Белгород шагьриъ швнуб-саб ресторан, йикк тартиб апIру цех, Кувагъ гъулаъ туристарин база, Табасаран райондиъ швнуб-саб йишваъ туканар а.
Сабирин гафариинди, жвуваз ккуниганси уьмур хъапIри вердиш духьнайи дугъаз, эскервалин сабпи йигъари гъагъиди алабхънийи. Бязиган вахт адарди суткйириинди даърахру вахтарра гъахьнийи.
«Багъри ватандиъ гьамцдар дюшюшар айиган, гъирагъдиъ деъну, узхьан архаинди лигуз шуладайзухьан. СВО-йиз гъягъюрза ва ихь баярин гъвалахъ ватан уьбхбан женгариъ иштирак шулза, кIури, фикир гъапIунза», – ктибтура Сабир Мирзоевди.
Хусуси метлеб айи операция гъябгъюрайи вахтна Сабириз жюрбежюр регионариан вуйи дустар артухъ гъахьну. Дурар сарсарин тажрубайихъди таниш шула.
«Узу эскрар асас вуди жямяаьтлугъ ляхнарин, мяишатдин, тяминвалин тажрубайихъди таниш апIураза. Йикк тартиб апIру йиз хусуси цехназ душну, гьадушв’ан баяриз лазим вуйи вари ипIру сурсатар хьади гъюри шулза. ЛНР-риз, Луганскдиз командировкйиризра гьаъри шулзу», – аьлава гъапIнийи ихь эскри.
Сабир Мирзаев гъи хайлиндариз намуна духьна. Дугъан дустари, таниш инсанари, Ватандин маракьар уьрхюри хусуси метлеб айи дявдин операцияйиъ иштирак хьуз гъягъюз Сабири чпин гьиссар уягъ гъапIуваликан ва чпиз ужуб дарс тувуваликан кIура.
