Январин 15-пи йигъан Урусатдин Президент Владимир Путин, РФ-дин Конституцияйиз асас вуди, уьлкейиъ айи аьгьвалатнакан, айтIан ва чIатан политикайин асас терефарикан Федералин Собраниейихьна вуйи гьар йисандин Послание хьади удучIвну гъулхну. Аьдат вуйиганси, Посланиейихъ хъпехъуз Федералин Собраниейин кьюбиб палатйирин депутатар, РФ-дин Правительствойин вакилар, Конституцияйин ва Верховный сударин председателар, генпрокурор, Центризбиркомдин председатель, Гьисабнан палатайин глава, Госсоветдин членар, уьлкейин асас динарин кIулиъ айидар ва Урусатдин Жямяаьтлугъ палатайин вакилар уч гъахьнийи.
Гьаму йисан Урусатдин Президент Владимир Путин Федералин Собраниейихьна Послание хьади цIийи йисандин эвелиъ илтIикIну. Президентдин гафариинди, кьаназ гъидритди уьлкейин улихь дийигънайи яшайишдин, экономикайин, технологияйин месэлйир гьял дапIну ккунду. Гъи ихь жямяаьтлугъди дигиш’валар тIалаб апIурайивал ачухъди рябкъюра.
Владимир Путинди чан Посланиейин сифте кIулиъ Урусатдин кьисмат агьалйирин кьадарнакан асиллу вуйивализ фикир тувну. «Уьлкейиъ саки 147 миллион кас яшамиш шула. Кьялан гьисабниинди, бабкан шулайи бицIидарин кьадарну 1,5 процент тяйин апIура. Тевурхьа: 1943-пи йисан бицIидар бабкан хьпан кьадар 1,3 процент вуйи. 2024-пи йисаз му улупуб 1,7 проценттIан цIиб дарди дубхьну ккунду», – къайд гъапIну Урусатдин Президентди. Дугъан гафариинди, Урусатдиъ демографияйин гележегдиз чIуру тясир апIурайиб – бицIидар айи хизанарин асккан гъазанжар ву. Дугъу федерацияйин субъектарин главйири чпин улихь дивнайи месэлйир гьял дарапIбакан, му жюре-йиинди ляхин апIуз хай даршлуваликан, 2021-пи йисан аьхириз варидари чпин улихь дивнайи месэлйир гьял дапIну ккуниваликан гъапнийи.
Президентди къайд гъапIганси, гьаму йисан январин вазлилан башламиш дапIну, хизандиъ инсандин кIулихъ яшамиш хьпан бадали чарасуз лазим вуйи кадар пул кьюб ражари алабхъури адру хизандиъ айи сарпи ва кьюрпи бицIидариз, дурарин шубуд йис тамам хьайизкьан, гьар вазлиъ тувру пособие, кьялан гьисабниинди, 11 агъзур манатдин кьадарнаъди тяйин апIиди. Хъа бицIирин шубуд йис тамам гъабхьиган, хизан читин аьгьвалатнаъ ади хьуб мумкин ву. Гьаддихъди аьлакьалу вуди Владимир Путинди, 2020-пи йисан 1-пи январилан башламиш дапIну, 3-7 йисаъ айи бицIидаризра гьар вазлиъ пособие тяйин апIбан месэлайизра фикир тувувал ккун гъапIну. Му яшнан бицIидариз, эгер хизандин гъазанж инсандин кIулихъ яшамиш хьпан бадали чарасуз лазим вуйи пулин тяйин дапIнайи кьадартIан дарш, пособие тувру.
Яркьуди Посланиейин асас тезисар газатдин 6-пи машнаъ урхуз шулучвхьан.
