Ихь рякъяриъ хатIалу дюшюшар хьувал, асас вуди кьюрдун вахтна, гизафси рякъярин гьялнакан асиллу ву. Гьарсаб гъулан варитIан асас девлетра рякъ ву. Аьхиримжи вахтари «Табасаран район» МР-иъ райондин айитI вуйи ва федералин эгьемиятнан рякъяр рас ва цIийи алаъбаз аьхю фикир тувра.
Табасаран райондин рякъярин кьюрдун вахт-нахьна вуйи гьязурлугвал аьгъю апIбан бадали, узу «Табасаран райондин ДТП №33» АО-йин аьхюну инженер Уьсман Аьлимирзаевдихьна илтIикIнийза. Уьсман Гьяжи-ибрагьимовичди узуз, Таба-саран райондин рякъяр кьюрдун вахтнахьна гьязур апIури, чпи гъахурайи ляхнарикан ктибтнийи.
– Вахтниинди ва лазим вуйи саягъниинди республикайин ва райондин рякъяр кьюрдун фаслихьна гьязур апIбан бадали, «Табасарандин ДТП №33» АО-йи 2019-2020-пи йисариз «Дагестанавтодор» ГКУ-йихъди йикьрар йитIну, духну ккуни серенжемарин план гьязур дапIна. Думу пландиз асас вуди, учу саб жерге ляхнар тамам гъапIунча. Мягьячгъала шагьриан рякъяриин миркк дибрисбан бадали алабхьру, кьилахьди кибикьнайи 15 тонна материал, хъа лап хатIалу рякъяриъ дюз мурччвар али кIалиб саягъниинди (штабель) дивбан бадали, 400 куб. метр республикайин ва райондин рякъяриз кьилахьди дибикьнайи гъум гъабхунча, ва гьацира миркк йивнайи рякъяриин машиндихъди алабхьуз кьилахьди дибикьнайи 150 куб. метр материал гьязур дапIнача.
Мидланра гъайри, йиф марцц дапIну, миркк йивнайи рякъяриин гьязур дапIнайи материал алабхьбан бадали, тялукь техникара гьязур дапIнача – 1 КДМ; 2 автогрейдер; 2 бульдозер; 1 экскаватор; 1 жара машинариъ гъагъ абхьру машин. Техника зат дидрибгъди либхбан бадали, кьюрдуз 15 тонна соляркара дубхна; рякъяриин лихурайи шоферарина рабочйири ляхниъ эргвал йивурайи вахтна рягьятвал гъадабгъбан ва жандиз мани апIбан бадали, халра гьязур дапIна. Жавабдар гъуллугъчйири нубатчивал гъабхбан бадали, графикра дюзмиш дапIнача, – хабар тувнийи йиз сюгьбатчийи.
– «Табасарандин ДТП №33» АО-йи 2019-пи йисан 10-пи октябрихъан мина хъюгъну, Табасаран райондин рякъяр кьюрдун вахтнахьна гьязур апIура. Сабпи ражари думу ляхин кIулиз адабгъбан бадали, ичIар айи йишвар дюз дапIну, рякъяр къайдайиз гъахну. Гьацира миркк дибиснайи, машар кайи лап читин рякъярихъди гъумра дабхьри а, – аьлава гъапIнийи Уьсман Аьлимирзаевди.
Кьабул дапIнайи уьлчм-йири кьюрдун вахтна Табасаран райондин рякъяриин аварйирин ва жара бедбахтвалин дюшюшарин кьадар цIиб хьуз гъитур кIури, умуд кивдихьа.
