Гъубшу йисан Дагъустандин гьюкуматдин чапханайиъ табасаран шаир Аьбдуллагь Аьбдурягьмановдин «Дагъларин нефес» кIуру шиърарин китаб чапдиан удубчIвну. 

 

Дупну ккундуки, Урусатдин писателарин Союздин член Аьбдуллагь Аьбдурягьмановдин кьалмиккан гъийин йигъаз поэзияйин шубуб китаб ккудучIвну: «Арсран гьибар», «Хиялнан акв», «Вахтнан сир». ЦIийи китаб 6 пайнакан ибарат ву: «Багъри юрдарин мукьам», «Уьмрин илтIикIбар», «Уьмрин завуъ дада ригъ ву», «Мюгьюббатнан ахсрин кIентIар», «Ватан ккуни юкIв аьхюб ву», «Фасларин мяракайиъ». Китабдин гьарсаб пай саб асас темайиз бахш дапIна: багъри юрдариз, уьмрин жилгъйириъ шлу гьядисйириз, дадайиз ва дугъан веледдихьна ва хизандихьна вуйи вафалувализ, мюгьюббатназ, Ватандин Аьхю дявдин къурхулу йисариз ва Табасарандин уткан табиаьтдиз.

ЦIийи гъварчнаъ автори, цIийиди гъидикIу шиърарси, улихьган гъидикIу бязи шиърар ва кьюб поэма – «Гъудубгу бахт», «Хиял бадали» – тувна.

«Кьувват ибшри» ччвур али кучIвбан макьалайиъ Дагъустандин халкьдин писатель Шагьвелед Шагьмардановди къайд дапIнайиганси, «чав бикIурайи гафнан жавабдарвал гьисс апIурайи, багъри ругарихьна ва ватанагьлийирихьна аьхю гирамивал ва гьюрмат айи» шаир чапдиан цIийи китаб удубчIвбахъди тебрик апIури, дугъаз поэзияйин экиндиъ хъана заан бегьер гъадабгъувал ккун апIурача.

Къайд апIурача, Даггиздиъ табасаран чIалниинди чапдиан удучIвурайи китабарин редактор Фируза Ражабовайи туву мялуматариинди, гьаму гьяфтайиъ 2019-пи йисандин юкьубпи кварталин пландик кипнайи Кюребег Мурсаловдин «Алдабхъу шалвар» кIуру зарафтарин китабра чапдиан удубчIвну. Дидкан яркьу мялумат газатдин гъюру нумрайиъ тувдича.