Ихь ватанагьли, Расул Гьямзатовдин фонднан вице-президент Гьябибат Аьзизова РД-йин милли политикайин ва диндин ляхнарин Министерствойин Жямяаьтлугъ советдин член ву.
Дугъу гизаф йисари, му министерствойихъди лап сигъ аьлакьйир уьрхюри, харижи уьлкйириъ бин ккебгънайи ихь ватанагьлийири чпи яшамиш шулайи йишвариъ Дагъустандин милли культура, чIалар артмиш апIбаан фициб ляхин гъабхураш, гьаддихъди таниш шули, дурариз республикайин терефнаан культурайин аьлакьйир уьрхбан лазим кюмек туври, зегьмет зигура.
2019-пи йисан аьхириъ Гьябибат Нажмудиновнайиз РФ-дин харижи уьлкйирихъди ляхин гъабхру Министерствойи халкьарин арайиъ, жара уьлкйириъ жямяаьтлугъ ляхин гъабхру тешкилатарин вакилариз тешкил дапIнайи серенжемдиъ иштирак хьуз теклиф гъафнийи. «Учуз гьадина теклиф апIувал ихь уьлкейин терефназ ригъ алабхъру терефнаъ айи уьлкйири илзигурайивалихъди, экономикайин санкцйир илитIурайивалихъди аьлакьалу вуйи. Серенжемдиъ Кафари Кавказдиан узуна Чечен Республикайин вакилтIан иштирак гъахьундайи. Совещаниейин ляхин жямяаьтлугъ тешкилатари ихь уьлкейиъси жара йишвариъра халкьдин культурайин проектар, албагну яшамиш хьувализ кюмек тувру серенжемар яркьуди духну ккунивализ бахш дапIнайи. Серенжемдиъ РФ-дин харижи уьлкйирихъди ляхин гъабхру министр Сергей Лавровди чан улхбаъ учу дубхну ккуни ляхнин асас терефар улупнийи.
Москвайиз гъягъруган, узу гьарганси «Расул Гьямзатов дюн’яйин уьлкйириъ» выс-тавкара хьади гъушнийза. Гьаддиинди узуз дагъустанлуйирин дугъри гъуншивалин, дуствал уьбхюз гьязур вуйивалин терефар улупуз ккундийзуз. Гьадму ляхин апIуз узхьан удукьунзухьан. Выставкайиз вари аьхю аьшкьниинди гъилигнийи», – къайд гъапIнийи ич сюгьбатнаъ Гьябибат Нажмудиновнайи.
Гьябибат Аьзизовайи жикъиди Расул Гьямзатовдин фондну гъабхурайи ляхниканра ктибтнийи: «Таллиндиъ айи культурайин центрин теклифниинди 2 ражари Эстонияйиз гъушунза. Ду-шваъ ихь дагъустанлу Апанди Мягьмудовди ватанагьлийирихъди, Расул Гьямзатовдин фонднахъди лап багахьлу аьлакьйир урхюра. Белоруссияйиъ айи ихь ватанагьлийирихъди Хизри Эседуллаевдин кюмекниинди лап ужудар аьлакьйир уьрхюрача. Францияйиъ айи дагъустанлуйирира ватандин культура кIваълан гьадрапIбан ляхин лап ужуди гъабхура. Швецияйиъ дагъустанлуйирин варитIан аьхю диаспора а. Дидин кIулиъ айи Сергей Капиевди учв яшамиш шулайи уьлкейиъ Дагъустандин культурайин аьхю фестивалар тешкил апIури шулу. Болгарияйиъ яшамиш шулайи ихь ватанагьлийири гъахру серенжемариъра иштирак шулача. Расул Гьямзатовди, Ирандиз гъягъюри, ерли шаирарихъди ва писателарихъди аьлакьйир уьрхюри гъахьну.
Думу уьлкейиъ Дагъустандин гьаргандин вакилвалин идарайи ляхин апIура. Англияйиъ айи ватанагьлийирира фонднахъди аьлакьйир урхюра. ВаритIан сигъди ихь республикайихъди аьлакьйир уьрхюрайи уьлке Азербайжан ву. 2019-пи йисан делегацияйин дахилнаъди дина душнача. Бакуйиъ серенжем гъубху зал инсанари кьикьнигъди абцIнайи.
Гьаму улихьнаси Расул Гьямзатовдин фонднаъ РД-йин милли политикайин Министерствойин вакилари, Дагъустандиъ айи Грузияйин диаспорайин председатель Анзор Берикаш’вили, Кьибла Кавказдиъ айи ихь ватанагьлийирин вакиларра ади, совещание гъубхнийи. Думу совещаниейиъ милли политикайин министерствойи гьаму йисан Грузияйиз, Болгарияйиз ва Францияйиз гъягъюз планламиш дапIнайиваликан мялум гъапIнийи. Гьаму уьлк-йириз гъягъру делегацйирин дахилнаъ узура аза, фицики «Расул Гьямзатов дюн’яйин уьлкйириъ» ва «Лизи кьарнйир – кIваинди гъитбан гъушар» кIуру выставкйир Дагъустандин делегацияйин суратси духьна», – гъапнийи ич сюгьбатнан аьхириъ Гьябибат Нажмудиновнайи.
