Гьюрматлу ватанагьлийир!
«Табасарандин нурар» газатдин редакцияйи бабарин Йигъаз бахш вуди республикайин мектебариъ урхурайидарин арайиъ «Йиз дада дюн’яйиъ варитIан ужур ву» темайиан мектебдин сочиненйирин конкурс гъабхура. Думу конкурсдин натижйир мартдин 11-пи йигъан йивруваликан мялумат тувнийча.
Амма, табасаран ватандашарин, мектебариъ урхурайи баяр-шубарин ва мялимарин конкурсдихьна вуйи маракьлувал гъябкъиган, дидиъ иштирак хьуз кьаст айидарин кьадар артухъ шулайивалиан ва агьалйирин терефнаан, конкурсдин йигъ цIиб кьаназ давам апIуб ккун апIури, илтIикIувалар гъюрайивалиан, редакцияйин коллективди ва конкурсдин тешкиллувалин комитетди конкурс мартдин аьхиризкьан давам апIуз къарар адабгъну.
Сочиненйирин кьадар гизаф вуйивализ лигну, дурарикан маракьлударсдар «Табасарандин нурар» газатдин машариъ чап апIидича. Хъа гьарсаб сочинениейихъди жа-жаради газатдин инстаграмдиъ ва социалин сетариъ айи машариъ таниш хьуз шулу.
Хъа гъи конкурсдиз хъадаънайи сабпи сочиненйирихъди учву таниш апIурача. Сочиненйир, бицIидарин хатI уьбхюри, гъалатIар ктадагъди туврача.
Сифте дада кIуз дубгъур бицIири…
Дада. Яраб му гаф фукьан уткануб вуйкIа, му гафнан гьарсаб сес веледдин ибариз фукьан ширинди ебхьурийкIа. Гьарсар инсанди гизаф дарш йигъан саб ражарикьан чан мелзналан кIурушул. Даршул уьмриъ бицIир пашман, эгер чан дада аьлхъюри, шадди, ва сагъди чан гъвалахъ хъайиган. Дада ву алаърур велед дюз рякъ’ин, насигьят туврур, чIурубдихъан веледдиз гиран даршлиганси хъдаърур. Узуз йиз уьмриъ дада гизаф гирами вузуз. Думу йиз дустра, йиз гележегдин мяълимра, йиз шадвалра вуйиз. Йиз дадатIан ужур дюн’яйиин зат алдруси вузуз. Дугъу узуз чахьан шлубра – даршлубра вари апIуру, дадиз учуз, чан веледариз, «ваъ»пуз аьйдар. Узу гьарсад йигъан гилигури шулза хябяхъ хьайиз, дада хулаз гъюру вахтназ. Йиз багъри инсан хулаъ учIвиган мучIу йшвра аку шулиз, пашманвал кашра чав-чаз дубгру. Хъа йишв гъабшиган гилигури шулза гвачIин хьайиз, дада дуфну дих апIайиз «гъудужв мектебдиз вахт шула» кIуру гафар куркIси нивкI’ан дишла уягъ шулза, амси йигъра ригъ алибси шулзуз. Дадайин гьюрмат гьаригъан, гьарсаб вахтна, гьарсар касди уьбхну ккунду. Думу фукьан яшнан кьаби гъашишра, веледдиз кьаби шулдар. Дада гьариган узуз кюмекназ хъуркьру, узу шиб уццурайиз гъапиш дугъан юкIв уццру шулу. Йиз дада – йиз уьмур вуйиз. Чухсагъул, Жан гирами ДАДА увуз, ва уву йиз дада вуди узуз бахш гъапIу Аллагьдиз!!!
Ширин вузуз му яв нефес
Эй, зу гъюрхю багъри дада
Гьарган хулаъ хьуб му яв сес .
Яшайишдин шадвал вуда.
Султанабидова Фаизат, 7-пи классдин ученица, ТIюрягъ гъул
Йиз дадайин сумчIурна юкьуд йис ву. Думу уьмриъ варитIан багьалу кас вуйиз. Дадайи узуз вари тувну. Дугъу узуз гафар апIуз, лицуз, гьисаб апIуз улупну. Узуз сабпирди кюмекназ хъуркьрур, йиз гьарган гъавриъ ахърур анжагъ багъри дадатIан дар. Думу аьхю сабур айир ву. Дугъу гьарган узуз уччвуб гафтIан апIурдар. Нагагь узу иццру гъахьиш, дугъу, чахьан шлубра-даршлубра дапIну, кюмек апIуру. Дадайи ужуб насигьят тувру, думу варитIан аькьюллур ва кIубанур ву.
Узуз йиз дада гьарган шадди ва жандин сагъвал ади ккундузуз. Гъит думу узкан разиди гъузри. Узуз думу гизаф ккундузуз.
Дада, йиз дада, багъри дада!… Му гаф дюн’яйиъ варитIан багьалуб ву. Аьхю чухсагъул кIураза йиз дадайиз.
Йиз дада! Дюн’яйиъ варитIан ужур Дада!
Мирзаев Муса, 2-пи классдин ученик, ТIюрягъ гъул
